महाराष्ट्रात पावसाचा हाहाकार; मराठवाडा आणि पश्चिम महाराष्ट्रात जनजीवन विस्कळीत, शेतीचे प्रचंड नुकसान
विषेश प्रतिनिधी – वर्षा चव्हाण
महाराष्ट्रात सध्या नवरात्रोत्सव सुरू असतानाच, राज्यातील अनेक भागांमध्ये पावसाने थैमान घातले आहे. विशेषतः मराठवाडा आणि पश्चिम महाराष्ट्रात गेल्या 48 तासांपासून सुरू असलेल्या मुसळधार पावसामुळे जनजीवन विस्कळीत झाले असून, अनेक जिल्ह्यांमध्ये पूरसदृश्य परिस्थिती निर्माण झाली आहे.
🟣मराठवाड्यातील गंभीर स्थिती
मराठवाड्यातील धाराशिव, बीड, जालना आणि लातूर जिल्ह्यांत पावसाचा जोर अधिक असल्याचे पाहायला मिळाले.
1. धाराशिव जिल्ह्यात, खैरी नदीला आलेल्या पुरामुळे परंडा तालुक्यातील शेळगाव गाव पूर्णपणे पाण्याने वेढले गेले आहे. चांदणी धरणातून पाण्याचा विसर्ग सुरू असल्याने, नदीकाठच्या गावांना सतर्कतेचा इशारा देण्यात आला आहे.
2. बीड जिल्ह्यात, आष्टी तालुक्यातील कडा परिसरात दुसऱ्यांदा अतिवृष्टी झाल्याने कडी नदीला पूर आला असून, सिंदफणा आणि मांजरा नद्यांची पातळी वाढली आहे. शाळा व महाविद्यालयांना सुट्टी जाहीर करण्यात आली आहे.
3. जालना जिल्ह्यात, जायकवाडी धरणातून सोडण्यात आलेल्या पाण्यामुळे गोदावरी नदीला पूर आला आहे. परतूर तालुक्यातील गोळेगावमध्ये पाणी शिरल्याने, पुनर्वसनाची मागणी जोर धरू लागली आहे.
4. लातूर जिल्ह्यात, सावरगाव आणि धानोरी येथे ढगफुटीसदृश्य पावसामुळे वाहतूक ठप्प झाली असून, शेतकऱ्यांचे पीक संपूर्णतः नष्ट झाले आहे.
🟡पश्चिम महाराष्ट्रातही मुसळधार पावसाचा फटका
1. सोलापूर जिल्ह्यात, मध्यरात्री झालेल्या पावसामुळे सीना नदीला पूर आला आहे. मोहोळ, दक्षिण सोलापूर आणि उत्तर सोलापूर तालुक्यांमध्ये धोका निर्माण झाला आहे. नदीपात्रातील पाणी शेतीत शिरल्याने पिकांचे मोठे नुकसान झाले आहे.
2. अहिल्यानगर (पाथर्डी, अहमदनगर जिल्हा) मध्ये देखील पावसामुळे रस्ते पाण्यामुळे वाहून गेले असून, अनेक भागांतील जनजीवन ठप्प झाले आहे. प्रशासनाने शाळा बंद ठेवण्याचे आदेश दिले आहेत.
🟢शेतकरी अडचणीत, नुकसान भरपाईची मागणी
या अभूतपूर्व पावसामुळे खरीप हंगामातील अनेक पिके पूर्णपणे उद्ध्वस्त झाली आहेत. शेतकऱ्यांनी तातडीने सर्वेक्षण करून सरसकट मदत देण्याची मागणी केली आहे. अनेक ठिकाणी नागरिकांना छतांवर आणि झाडांवर आश्रय घ्यावा लागला असून, एनडीआरएफच्या पथकांनी वेळेवर धाव घेत बचावकार्य केले आहे.
🟤प्रशासन अलर्ट मोडवर, पण मदतीचा वेग कमी
राज्य प्रशासनाने आपत्ती निवारण यंत्रणा सक्रिय केल्या असल्या, तरी मोठ्या प्रमाणावर मदत पोहोचण्यात उशीर होत असल्याची तक्रार स्थानिकांकडून केली जात आहे. पावसाचा जोर ओसरत नाही तोपर्यंत स्थिती आणखी गंभीर होण्याची शक्यता वर्तवली जात आहे.
🔴सार्वजनिक आरोग्य, वाहतूक व्यवस्था धोक्यात
पाण्यात अडकलेल्या घरांमध्ये रोगराईचा धोका निर्माण झाला आहे. तसेच अनेक रस्त्यांवरील वाहतूक पाण्यामुळे बंद झाली असून, रुग्णवाहिका आणि आपत्कालीन सेवा पुरवण्यात अडचणी येत आहेत.
राज्य शासनाने लवकरात लवकर सर्वेक्षण करून, पूरग्रस्तांना तत्काळ मदत द्यावी, अशी मागणी जोर धरू लागली आहे.
