अमळनेर तालुक्यात शालेय शासकीय क्रीडा स्पर्धांचा थरार; १७ सप्टेंबरपासून रंगणार मैदान
अमळनेर : विक्की जाधव.
क्रीडा व युवक सेवा संचालनालय, पुणे, जळगाव जिल्हा क्रीडा अधिकारी कार्यालय व अमळनेर पंचायत समिती यांच्या संयुक्त विद्यमाने सन २०२६-२७ च्या शालेय शासकीय तालुकास्तरीय क्रीडा स्पर्धांना १७ सप्टेंबरपासून सुरुवात होत आहे. बुद्धिबळ, बॅडमिंटन, कुस्ती, फुटबॉल, व्हॉलीबॉल, कॅरम, कबड्डी, खो-खो, क्रिकेट तसेच मैदानी स्पर्धांमधून अमळनेर तालुक्यातील विद्यार्थ्यांना आपले क्रीडा कौशल्य दाखविण्याची संधी मिळणार आहे.
तालुकास्तरीय स्पर्धांचे वेळापत्रकही जाहीर करण्यात आले असून १७ व १८ सप्टेंबरला नोबल पोतदार स्कूल येथे बुद्धिबळ, १८ व १९ सप्टेंबरला प्रताप कॉलेज हॉल येथे बॅडमिंटन, २१ सप्टेंबरला तालुका क्रीडा संकुलात कुस्ती, २३ व २४ सप्टेंबरला प्रताप कॉलेज येथे फुटबॉल, तर २६ व २७ सप्टेंबरला जय योगेश्वर माध्यमिक विद्यालय येथे व्हॉलीबॉल स्पर्धा होणार आहेत. त्यानंतर ३ व ५ ऑक्टोबरला अँड. ललिता पाटील इंग्लिश स्कूल येथे कॅरम, ७ व ८ ऑक्टोबरला सायर देवी स्कूल येथे कबड्डी, १० व १२ ऑक्टोबरला आ.मा. पाटील आश्रमशाळा, रणाईचे येथे खो-खो, १३ व १४ ऑक्टोबरला प्रताप कॉलेज येथे क्रिकेट आणि १६ व १७ ऑक्टोबरला तालुका क्रीडा संकुलात मैदानी स्पर्धा होणार आहेत.
दरम्यान, तालुक्यातील सर्व शाळा व ज्युनिअर कॉलेजांनी स्पर्धांसाठी ऑनलाइन नोंदणी, ऑनलाइन फी भरण्याची प्रक्रिया तसेच स्पर्धेचे प्रवेश अर्ज पूर्ण करून संघ व खेळाडू तयार ठेवावेत, असे आवाहन करण्यात आले आहे. अमळनेर तालुका क्रीडा समितीचे क्रीडा अधिकारी जगदिश चौधरी, एस.पी. वाघ व संजय पाटील यांनी ही माहिती दिली असून, आगामी स्पर्धांमुळे अमळनेरच्या शालेय क्रीडांगणावर चुरशीच्या लढती पाहायला मिळणार आहेत.
