16 लाख 96 हजार शेतकऱ्यांना दिलासा – 2 लाखांपर्यंत कर्जमाफीची दुसरी यादी जाहीर
कर्जमाफीनंतर दुसऱ्याच दिवशी नवीन पीक कर्ज मिळणार – कृषीमंत्री दत्तात्रय भरणे
(निलेश गायकवाड)
पुणे, 31 जुलै : पुण्यश्लोक अहिल्यादेवी होळकर शेतकरी कर्जमुक्ती योजनेअंतर्गत राज्य सरकारने मोठा निर्णय घेतला आहे. 2 लाख रुपयांपर्यंत थकबाकी असलेल्या सर्व पात्र शेतकऱ्यांचे कर्ज माफ केले जाणार आहे. यासाठीची दुसरी यादी तयार करण्यात आल्याची माहिती राज्याचे कृषिमंत्री दत्तात्रय भरणे यांनी दिली.
पुणे जिल्हा मध्यवर्ती सहकारी बँक येथे पत्रकार परिषदेत बोलताना ते म्हणाले, “राज्यात एकूण 16 लाख 96 हजार खातेधारक शेतकऱ्यांसाठी कर्जमाफीची दुसरी यादी तयार झाली आहे. या सर्वांना विशिष्ट क्रमांकही देण्यात आले आहेत.”
महत्त्वाचे मुद्दे:
1. कोणाला मिळणार लाभ?
राष्ट्रीयकृत बँका, सहकारी बँका आणि शासन यांच्यात झालेल्या बैठकीनुसार, ज्या शेतकऱ्यांचे कर्ज 2 लाखांच्या आत आहे अशा सर्व पात्र शेतकऱ्यांची कर्जमाफी केली जाईल.
2. नवीन कर्जाला मुभा
कर्जमाफी झाल्यानंतर शेतकऱ्यांना कर्ज नसल्याचा दाखला देण्यात येईल. त्यामुळे कर्जमाफीनंतर लगेच दुसऱ्या दिवशी त्यांना नवीन पीक कर्ज घेता येणार आहे, असे भरणे यांनी स्पष्ट केले.
3. बँकांच्या कारभारावर नाराजी
शेतकरी ई-केवायसीसाठी बँकेत जात असताना कर्जाची रक्कम, थकीत रक्कम आणि व्याजात तफावत दिसत असल्याच्या तक्रारी राष्ट्रीयकृत बँकांबाबत येत आहेत, याकडेही मंत्र्यांनी लक्ष वेधले.
या घोषणेमुळे राज्यातील लाखो शेतकऱ्यांना मोठा आर्थिक दिलासा मिळणार असून शेतीसाठी त्यांना पुन्हा उभे राहण्यास मदत होणार आहे.
