त्या नराधमाला आमच्या ताब्यात द्या म्हणत जमवाने केली जाळपोळ
अमळनेर : विक्की जाधव
जामनेर तालुक्यातील एका गावातील सहा वर्षीय बालिकेवर अत्याचार करून खून करणाऱ्या नराधमाला अटक झाल्याची वार्ता जामनेर शहरात पसरताच मोठा जमाव जमला. त्यानंतर जमावाने नराधमाला आमच्या ताब्यात द्या, म्हणून मागणी करत टायर जाळले तसेच महामार्ग रोखला. तर जामनेर पोलीस ठाण्यावर हल्लाबोल करत प्रचंड तोडफोड केली. यात पोलीस निरीक्षक किरण शिंदे यांच्यासह १० ते १२ पोलीस जखमी झाल्याची घटना घडली. प्रत्युत्तरात पोलिसांनी लाठीचार्ज केला. पोलीस अधीक्षक आल्यानंतर रात्री १०.४५ वाजेच्या सुमारास परिस्थिती नियंत्रणात आली. त्यानंतर शहरात तणावपूर्ण शांतता होती.
मिळालेल्या माहितीनुसार, जामनेर तालुक्यातील एका सहा वर्षीय बालिकेवर एका नराधमाने अत्याचार करून खून केल्याची धक्कादायक घटना ९ दिवसापूर्वी घडली होती. तेव्हापासूनच या घटनेतील नराधम हा फरार झालेला होता. त्याला २० जून रोजी पोलिसांनी शिताफीने भुसावळ तालुक्यात तापी नदीजवळ असणाऱ्या एका भिल्ल वस्तीतून ताब्यात घेत्यावर अटक केली. दरम्यान, या नराधमाला अटक झाल्याची माहिती जामनेर शहरात पसरताच मोठा जमाव एकत्र झाला. त्यांनी महामार्ग रोखून चौकात टायर जाळून घटनेचा निषेध केला. तसेच नराधमाला ताब्यात द्या, अशी मागणी जमावाने केली. या वेळी पोलिसांनी जमावाची समजूत काढण्याचा प्रयत्न केला. मात्र, त्यानंतर संतप्त जमाव जामनेर पोलीस ठाण्याकडे धाव घेतली. त्यानंतर जमावाने पोलीस ठाण्यावर दगडफेक करत मोठी तोडफोड केली. त्यानंतर पो.नि. किरण शिंदे यांच्यासह पोलिसांवर जमावाने दगडफेक केली. यात पो.नि. शिंदे यांच्यासह १० ते १२ पोलीस जखमी झाले आहेत. तसेच काही नागरिकही जखमी झाल्याचे कळते. तर घटनेची माहिती वरिष्ठांना कळाल्यानंतर दंगा नियंत्रण पथकाला जामनेर शहरांमध्ये रवाना करण्यात आले आहे.
पोलीस अधीक्षकांची घटनास्थळी धाव घटनेमुळे जामनेर तालुक्यासह जिल्ह्यात खळबळ उडाली आहे. ग्रामविकास व पंचायतराज, पर्यटन मंत्री गिरीश महाजन यांच्या जामनेरमध्येच दंगलसदृश्य स्थिती निर्माण झाल्यानंतर पोलिसांनी लाठीचार्ज सुरू केला आहे. तसेच हवेत १० ते १२ फायर केल्याची ही माहिती मिळाली. दरम्यान, पोलीस अधीक्षक डॉ. महेश्वर रेड्डी, डीवायएसपी घटनास्थळी दाखल झाले होते. परिस्थिती सध्या नियंत्रणात आली असून या प्रकरणी ७ ते ८ संशयितांना पोलिसांनी ताब्यात घेतले आहे. तर पो.नि. शिंदे यांच्यासह पोलीस कर्मचारी हितेश महाजन, श्री. कुंभार, सुनील राठोड, आर. एस. कुमावत, संजय खंडारे, प्रीतम बारकले हे जखमी झाले आहेत. दंगा नियंत्रण पथकाची वाहने घटनास्थळी दाखल झाली आहेत. सध्या शहरात तणावपूर्ण शांतता पाहायला मिळत आहे
