दुष्काळी परिस्थितीच्या पार्श्वभूमीवर पिकांच्या नुकसानीचे पंचनामे सुरू
‘ट्रिगर-१’ लागू; शेतकऱ्यांनी आवश्यक कागदपत्रांसह पंचनामा प्रक्रियेस सहकार्य करण्याचे आवाहन
बारामती, प्रतिनिधी – वर्षा चव्हाण
खरीप हंगाम २०२६-२७ मध्ये दुष्काळी परिस्थिती निर्माण झाल्याच्या पार्श्वभूमीवर पिकांसाठी ‘ट्रिगर-१’ लागू करण्यात आला असून, तालुक्यात पिकांच्या झालेल्या नुकसानीचे प्रत्यक्ष शेतावर जाऊन पंचनामे करण्याची कार्यवाही सुरू करण्यात आली आहे. त्यामुळे नुकसानग्रस्त शेतकऱ्यांनी पंचनामा प्रक्रियेसाठी आवश्यक कागदपत्रे व माहिती उपलब्ध करून देत संबंधित अधिकारी व कर्मचाऱ्यांना सहकार्य करावे, असे आवाहन तालुका कृषी अधिकारी सचिन हाके यांनी केले आहे.
दुष्काळी परिस्थितीचा खरीप पिकांवर मोठ्या प्रमाणात परिणाम होण्याची शक्यता असल्याने प्रशासनाकडून नुकसानीची वस्तुनिष्ठ नोंद करण्याची प्रक्रिया हाती घेण्यात आली आहे. संबंधित अधिकारी व कर्मचारी प्रत्यक्ष शेतावर भेट देऊन पिकांची पाहणी करणार असून, नुकसानीचे स्वरूप व प्रमाण याची नोंद पंचनाम्यामध्ये करण्यात येणार आहे.
🟢आवश्यक कागदपत्रे उपलब्ध ठेवण्याचे आवाहन
पंचनामा प्रक्रियेदरम्यान शेतकऱ्यांनी आवश्यक कागदपत्रे तयार ठेवावीत. यामध्ये ७/१२ उतारा, ८-अ उतारा, शेतकरी ओळख क्रमांक, आधारकार्डची प्रत आणि बँक पासबुकची प्रत यांचा समावेश आहे. विशेषतः ७/१२ उताऱ्यावर संबंधित पिकाची पाहणी नोंद असणे आवश्यक असल्याचे कृषी विभागाने स्पष्ट केले आहे.
याशिवाय नुकसान झालेल्या पिकाचे भौगोलिक संदर्भासह छायाचित्र अर्थात जिओ-टॅग फोटो उपलब्ध ठेवणे आवश्यक आहे. या कागदपत्रांमुळे संबंधित शेतजमीन, पिकाचा तपशील आणि नुकसानग्रस्त क्षेत्राची पडताळणी करण्यास मदत होणार आहे.
🟡पंचनाम्यावेळी शेतकऱ्यांनी उपस्थित राहावे
पिकांच्या नुकसानीची अचूक आणि वस्तुनिष्ठ नोंद होण्यासाठी संबंधित शेतकऱ्यांनी पंचनामा करणारे अधिकारी व कर्मचारी यांना आवश्यक सहकार्य करावे. पंचनामा करण्यासाठी अधिकारी प्रत्यक्ष शेतावर आल्यानंतर शेतकऱ्यांनी शक्यतो त्या वेळी शेतावर उपस्थित राहावे, असे आवाहन करण्यात आले आहे.
नुकसानीची पाहणी करताना प्रत्यक्ष परिस्थिती, पिकाची अवस्था आणि नुकसानीचे प्रमाण यांची नोंद केली जाणार असल्याने शेतकऱ्यांनी आपली आवश्यक कागदपत्रे वेळेत उपलब्ध करून द्यावीत. पंचनामा प्रक्रियेत कोणतीही अडचण निर्माण होऊ नये यासाठी संबंधित यंत्रणेशी समन्वय ठेवण्याचेही आवाहन करण्यात आले आहे.
🟤संबंधित अधिकाऱ्यांशी संपर्क साधण्याचे आवाहन
तालुक्यातील नुकसानग्रस्त शेतकऱ्यांनी ग्राम महसूल अधिकारी, ग्रामविकास अधिकारी तसेच सहायक कृषी अधिकारी यांच्याशी संपर्क साधावा. पिकांचे नुकसान झालेल्या शेतकऱ्यांनी पंचनामा प्रक्रियेपासून वंचित राहू नये, यासाठी प्रशासनाने आवश्यक माहिती व कागदपत्रांसह सहकार्य करण्याचे आवाहन केले आहे.
दुष्काळी परिस्थितीत पिकांचे नुकसान झालेल्या शेतकऱ्यांसाठी नुकसान नोंदणी आणि पंचनामा प्रक्रिया महत्त्वाची असल्याने संबंधितांनी प्रशासनाकडून करण्यात येणाऱ्या पाहणीस सहकार्य करावे. “नुकसानीची अचूक नोंद होण्यासाठी आवश्यक कागदपत्रे वेळेत उपलब्ध करून द्यावीत आणि पंचनामा करताना प्रत्यक्ष शेतावर उपस्थित राहावे,” असे तालुका कृषी अधिकारी सचिन हाके यांनी सांगितले.
