“भिगवण-राशिन रोडवरील उड्डाणपुलावर मोठा खड्डा आणि बाहेर आलेल्या सळ्या; 12 तास उलटले तरी PWD चे दुर्लक्ष, रात्री मोठा अपघात होण्याची भीती”
(निलेश गायकवाड)
भिगवण, ता. इंदापूर, जि. पुणे : दि. 07/08/2026
भिगवण-राशिन रोडवरील उड्डाण पुलावर रस्त्याच्या मध्यभागी मोठा खड्डा पडला असून त्यामधून लोखंडी गज आणि सळई बाहेर आल्या आहेत. या धोकादायक स्थितीकडे सार्वजनिक बांधकाम विभाग, भिगवण च्या अधिकाऱ्यांचे मात्र पूर्णपणे दुर्लक्ष होत आहे. तक्रार करून 12 तासांपेक्षा जास्त वेळ उलटून गेला तरी कोणतीही उपाययोजना करण्यात आलेली नाही.
प्रवाशांचा जीव धोक्यात
दिवसा वाहनांची वर्दळ कमी असल्याने अपघात टळत आहेत, परंतु रात्रीच्या वेळी या ठिकाणी मोठा अपघात होण्याची दाट शक्यता आहे. खड्डा आणि बाहेर आलेल्या सळ्यांमुळे दुचाकी, चारचाकी वाहन चालकांचा तोल जाऊन अपघात होऊ शकतो. त्यामुळे या मार्गाने ये-जा करणाऱ्या हजारो प्रवाशांचा जीव धोक्यात आला आहे.
ठेकेदार कोण? कारवाई कधी?
सदर उड्डाण पूल तापडिया कॉन्ट्रॅक्टर यांच्यामार्फत बांधण्यात आला आहे. निकृष्ट दर्जाचे काम आणि देखभालीअभावी अवघ्या काही वर्षातच पुलाची ही अवस्था झाली आहे, अशी चर्चा नागरिकांमध्ये आहे.
स्थानिकांनी PWD भिगवण कार्यालयात तक्रार करूनही अद्याप बॅरिकेड्स लावणे, खड्डा बुजवणे यासारखी तात्पुरती उपाययोजना देखील केलेली नाही.
नागरिकांची मागणी
नागरिकांनी प्रशासनाला तातडीने या ठिकाणी बॅरिकेड्स लावून दुरुस्तीचे काम सुरू करण्याची मागणी केली आहे. अन्यथा उद्या एखादा मोठा अपघात घडल्यास त्याला पूर्णतः सार्वजनिक बांधकाम विभाग जबाबदार राहील, असा इशाराही देण्यात आला आहे.
प्रशासनाने याची तातडीने दखल घेऊन प्रवाशांच्या सुरक्षेसाठी पावले उचलावीत, अशी मागणी जोर धरत आहे.
