बारामती तालुका पोलिसांची धडाकेबाज कारवाई;बुलेट चोरी करणाऱ्या सराईत चोरट्याच्या मुसक्या आवळल्या!
आरोपीकडून १३ बुलेटसह ६ मोटारसायकली हस्तगत
बारामती | प्रतिनिधी – वर्षा चव्हाण
बारामती शहर तसेच बारामती तालुका पोलीस ठाण्याच्या हद्दीत मागील काही दिवसांपासून वाढलेल्या बुलेट व मोटारसायकल चोरीच्या घटनांचा स्थानिक गुन्हे शाखा आणि बारामती तालुका पोलिसांनी छडा लावला आहे. सराईत मोटारसायकल चोरट्याला अटक करून त्याच्याकडून तब्बल १३ बुलेट आणि ६ इतर मोटारसायकली अशा एकूण १९ दुचाकी जप्त करण्यात आल्या आहेत. या वाहनांची अंदाजे किंमत ३० लाख रुपये असल्याचे पोलिसांनी सांगितले.
या कारवाईमुळे बारामती शहर आणि बारामती तालुका पोलीस ठाण्यात दाखल असलेले १९ मोटारसायकल चोरीचे गुन्हे उघडकीस आले आहेत.
पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, बारामती उपविभागाचे उपविभागीय पोलीस अधिकारी चैतन्य कदम यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर आणि बारामती तालुका पोलीस ठाण्याचे पोलीस निरीक्षक नारायण पवार यांनी चोरीच्या घटनांना आळा घालण्यासाठी विशेष पथके तयार केली होती. या पथकांना रात्रगस्त, पेट्रोलिंग, संशयित वाहने व व्यक्तींची तपासणी करण्याच्या सूचना देण्यात आल्या होत्या.
दरम्यान, स्थानिक गुन्हे शाखा व बारामती तालुका पोलिसांचे पथक बारामती शहर परिसरात गस्त घालत असताना मेडिकल कॉलेज परिसरात एक संशयित व्यक्ती चोरीची मोटारसायकल घेऊन येणार असल्याची गोपनीय माहिती पोलिसांना मिळाली. त्यानुसार पोलिसांनी परिसरात सापळा रचला.
काही वेळाने एक संशयित व्यक्ती चोरीची मोटारसायकल घेऊन पेन्सिल चौकाकडून मेडिकल कॉलेजच्या दिशेने जाताना पोलिसांच्या निदर्शनास आली. पोलिसांनी त्याचा पाठलाग करून त्याला ताब्यात घेतले. चौकशीदरम्यान त्याने आपले नाव समाधान बाळू काळे (वय २३, रा. मानेवाडी, ता. फलटण, जि. सातारा) असे सांगितले.
पोलिसांनी विश्वासात घेऊन अधिक चौकशी केली असता, आरोपीने रात्रीच्या वेळी बुलेटसह इतर मोटारसायकली चोरी केल्याची कबुली दिल्याचे पोलिसांनी सांगितले. विशेष म्हणजे, चोरी केलेल्या काही वाहनांवर महाराष्ट्र पोलीस, महाराष्ट्र वनसेवा आणि एसटी महामंडळाचे लोगो लावून पोलिसांची दिशाभूल करण्याचा तसेच चोरीच्या वाहनांचा वापर करून पोलिसांपासून बचाव करण्याचा प्रयत्न केल्याचे तपासात समोर आले आहे.
आरोपीकडून १३ बुलेट मोटारसायकली आणि ६ इतर मोटारसायकली अशा एकूण १९ दुचाकी जप्त करण्यात आल्या. या वाहनांची एकूण अंदाजे किंमत ३० लाख रुपये आहे.
१) MH ४२ BK ३००३, २) MH ४२ AV २१२१, ३) MH ४२ BK ०७४९, ४)MH ४२ BK ९७०९, ५) MH ४२ BD ९४९०, ६) MH ४२ AT ५४५५, ७) MH ४२ AZ ०३७४, ८) MH ४२ AZ १६१६, ९) MH ४२ AB १२१२, १०) MH ४२ TG २६७७, ११) MH ४२ AV ७८६९, १२) MH ४२ UQ ०३०३, १३) MH ४२ EA ९९७७, व ६ इतर मोटार सायकल असा जप्त करण्यात आल्या आहे.
या कारवाईमुळे बारामती शहर आणि बारामती तालुका पोलीस ठाण्याच्या हद्दीत दाखल असलेले एकूण १९ मोटारसायकल चोरीचे गुन्हे उघडकीस आले आहेत. आरोपी सध्या पोलीस कोठडी रिमांडमध्ये असून, चोरीच्या वाहनांमागे आणखी कोणी सहभागी आहे का, तसेच आरोपीने इतर ठिकाणी अशाच प्रकारच्या चोरी केल्या आहेत का, याचा पुढील तपास बारामती तालुका पोलीस करीत आहेत.
ही कारवाई मा. पोलीस अधीक्षक श्री. संदीप सिंह गिल्ल, साो. पुणे ग्रामीण, मा. अपर पोलीस अधीक्षक श्री. गणेश बिरादार बारामती विभाग, मा. उपविभागीय पोलीस अधिकारी चैतन्य कदम, बारामती उप विभाग, यांचे मार्गदर्शनाखाली, स्थानिक गुन्हे शाखेचे पोलीस निरीक्षक प्रमोद क्षीरसागर, बारामती तालुका पोलीस स्टेशनचे पोलीस निरीक्षक नारायण पवार, स्थानिक गुन्हे शाखेचे पोलीस उप निरीक्षक सुधीर वाळुंज, श्रेणी पो.स.ई बाळासाहेब कारंडे, स्थानिक गुन्हे शाखेचे पोलीस अंमलदार शिवाजी निकम, किशोर तेलंग, स्वप्निल अहिवळे, शैलेश स्वामी, गुलाब पाटील, सुलतान डांगे, तुषार चव्हाण, रईस मुलानी, गणेश डेरे, बारामती तालुका पोलीस ठाणे कडील पोलीस अंमलदार अभिजीत एकशिंगे, शशिकांत दळवी, भगवान थोरवे, मनोज पवार, सुरेंद्र वाघ, जितू शिंदे, भारत खारतोडे, जयश्री आटोळे, विठ्ठल तरंगे, यांनी केली आहे.
एकाच आरोपीकडून १९ दुचाकी जप्त झाल्याने बारामती परिसरातील वाहनचोरीच्या घटनांमध्ये मोठा उलगडा झाला असून, या कारवाईमुळे चोरीला गेलेल्या वाहनधारकांना दिलासा मिळाला आहे.
