तिरंग्याच्या रंगात सजले श्री मंगळदेव मंदिर; स्वातंत्र्यदिनाच्या पूर्वसंध्येला भक्तिमय वातावरण
अमळनेर : विक्की जाधव.
स्वातंत्र्यदिनाच्या पूर्वसंध्येला येथील प्रसिद्ध श्री मंगळग्रह मंदिरात देशभक्ती आणि भक्तीचा अनोखा संगम पाहायला मिळाला. श्री मंगळदेवांच्या मूर्तीभोवती आकर्षक तिरंगा सजावट करण्यात आली असून, भगवा, पांढरा आणि हिरवा रंगांनी मंदिर परिसर उजळून निघाला आहे.
राष्ट्रध्वजाच्या तिरंगी रंगांनी सजलेले श्री मंगळदेवांचे हे मनोहारी रूप भाविकांचे विशेष लक्ष वेधून घेत आहे. स्वातंत्र्यदिनाच्या पार्श्वभूमीवर मंदिरात करण्यात आलेली ही सजावट देशभक्तीची भावना जागवणारी ठरत असून, भक्तीच्या वातावरणात राष्ट्रप्रेमाची अनुभूती देत आहे.
श्री मंगळदेवांच्या सान्निध्यात तिरंग्याच्या रंगांची ही आकर्षक सजावट अमळनेरकरांसाठी स्वातंत्र्यदिनाचा उत्साह द्विगुणित करणारी ठरली आहे. मंदिरातील हे मनोहारी दृश्य सध्या भाविकांसह नागरिकांच्या आकर्षणाचा केंद्रबिंदू ठरत आहे.
