अमळनेर पोलिसांनी मोटारसायकल चोरास केली अटक; दोन दुचाकी जप्त
अमळनेर : विक्की जाधव.
शहरातील श्रीराम कॉलनी, शिरूड नाका परिसरातून चोरीस गेलेल्या मोटारसायकल चोरीचा गुन्हा अमळनेर पोलिसांनी उघडकीस आणला असून, या प्रकरणी विनायक उखा पाटील (रा. वेळोदे, ता. चोपडा, जि. जळगाव) याला अटक करण्यात आली आहे. त्याच्याकडून चोरीची मोटारसायकलसह आणखी एक दुचाकी असा एकूण दोन मोटारसायकली जप्त करण्यात आल्या आहेत.
श्रीराम कॉलनी, शिरूड नाका येथील रहिवासी हरेश गंभीर चौधरी यांची सुमारे २५ हजार रुपये किमतीची हिरो होंडा सीडी डिलक्स मोटारसायकल (क्र. एमएच १९ ए.क्यू. २१६२) अज्ञात चोरट्याने चोरून नेली होती. याप्रकरणी अमळनेर पोलिस ठाण्यात गुन्हा रजिस्टर क्रमांक ४१२/२०२६ अन्वये भा.न्या.संहितेच्या कलम ३०३(२) प्रमाणे गुन्हा दाखल करण्यात आला होता.
गुन्ह्याचा तपास सुरू असताना पोलिस निरीक्षक दत्तात्रय निकम यांना विनायक उखा पाटील हा चोरीच्या मोटारसायकली विक्री करत असल्याची माहिती मिळाली. त्यानुसार पोलिस उपनिरीक्षक शरद काकळीज, पोलिस हवालदार प्रमोद पाटील, पोलिस अंमलदार नरेश बडगुजर, नितीन मनोरे व उज्वल पाटील यांच्या पथकाने संशयिताचा शोध घेऊन त्याला ताब्यात घेतले. चौकशीदरम्यान त्याच्याकडून चोरीस गेलेली दुचाकी तसेच आणखी एक मोटारसायकल जप्त करण्यात आली.
ही कारवाई पोलिस अधीक्षक श्रीकांत धिवरे, अपर पोलिस अधीक्षक अशोक नखाते व उपविभागीय पोलिस अधिकारी विनायक कोते यांच्या मार्गदर्शनाखाली करण्यात आली. या कारवाईमुळे मोटारसायकल चोरीचा गुन्हा उघडकीस आला असून, संशयिताविरुद्ध पुढील कायदेशीर कारवाई सुरू आहे.
