करमाळा: करमाळा नगर परिषदेचे कर्मचारी बद्रीनाथ गायकवाड यांची सुकन्या कु. गायत्री गायकवाड हिने वकिलीच्या परीक्षेत घवघवीत यश संपादन केल्याबद्दल नगर परिषदेच्या वतीने तिचा विशेष सत्कार करण्यात आला. सोलापूर येथील नामांकित ‘डी. जी. बी. दयानंद लॉ कॉलेज’मधून माहे मार्च २०२६ मध्ये घेण्यात आलेल्या एल.एल.बी. (LLB) परीक्षेत ती उत्तीर्ण झाली आहे. तिच्या या यशाबद्दल स्थापत्य अभियंता अश्विनी जाधव यांच्या हस्ते तिचा शाल आणि पुष्पगुच्छ देऊन गौरव करण्यात आला.
याप्रसंगी बोलताना स्थापत्य अभियंता अश्विनी जाधव यांनी गायत्रीचे कौतुक केले आणि उपस्थित मुलींना मोलाचे मार्गदर्शन केले. आपल्या मनोगतात त्या म्हणाल्या, “आजच्या काळात मुलींनी पुढे येऊन उच्च शिक्षण घेतले पाहिजे. डॉक्टर, इंजिनिअर, वकील, आणि प्रशासकीय अधिकारी होऊन त्यांनी उच्च पदांवर झेप घ्यावी. केवळ शिक्षण न घेता त्या ज्ञानाचा उपयोग समाजाची सेवा करण्यासाठी करावा.” पुढे बोलताना त्यांनी आवाहन केले की, मुलींनीही आता मोठी स्वप्ने पाहण्याची आणि ती जिद्दीने पूर्ण करण्याची उमेद बाळगली पाहिजे. गायत्रीने येणाऱ्या काळात वकिली क्षेत्रात उत्कृष्ट कामगिरी करून स्वतःची एक वेगळी आणि स्वतंत्र ओळख निर्माण करावी, अशा शुभेच्छाही त्यांनी दिल्या.
या कौतुक सोहळ्याला नगर परिषदेचे कर्मचारी आणि शहरातील अनेक मान्यवर मोठ्या संख्येने उपस्थित होते. यामध्ये स्वप्निल बाळेकर, विपुल पुजारी, हिंदुराव जगताप, सोमनाथ सरवदे, संकल्प शहाणे, आकाश वाघमारे, शितल बहाड, सुप्रिया पालखे, दत्तात्रय घोलप, आबा नागटिळक, प्रदिप चौकटे, बापू खारगे, चिंटू कांबळे, विक्रम कांबळे, सचिन घाटुळे, अमोगसिद्ध परशेट्टी, संजय जगताप, सतिश भिसे आदींचा समावेश होता.
कार्यक्रमाचे अत्यंत नेटके आणि सुंदर सूत्रसंचालन अशोक मोरे यांनी केले, तर उपस्थितांचे आभार अभय देशपांडे यांनी मानले. गायत्रीच्या या यशामुळे गायकवाड कुटुंबासह संपूर्ण करमाळा नगर परिषद वर्तुळातून तिच्यावर अभिनंदनाचा वर्षाव होत आहे.
