चारित्र्यावर संशय… पत्नीवर चाकूने जीवघेणा हल्ला; पतीला ७ वर्षांची शिक्षा
अमळनेर : विक्की जाधव.
पत्नीच्या चारित्र्यावर संशय घेत तिच्यावर चाकूने जीवघेणा हल्ला करणाऱ्या पतीला अमळनेर येथील सत्र न्यायालयाने ७ वर्षे सश्रम कारावास व दंडाची शिक्षा सुनावली. भगवान रामदास शिंपी (वय ६०, रा. ताडेपुरा, पैलाड, ता. अमळनेर, जि. जळगाव) असे आरोपीचे नाव आहे.
१ नोव्हेंबर २०२३ रोजी सायंकाळी फिर्यादी महिला मजुरीचे काम करून घरी आल्यानंतर ती मुलगी रोशनी हिच्याशी मोबाईलवर बोलत होती. यावरून आरोपीने तिच्या चारित्र्यावर संशय घेत शिवीगाळ करत मारहाण केली व “आज तुला मारून टाकतो” अशी धमकी दिली.काही वेळानंतर आरोपी पुन्हा घरी येऊन घरासमोर बसलेल्या पत्नीला चापट-बुक्क्यांनी मारहाण करत पॅन्टच्या खिशातून धारदार हत्यार काढून तिच्या गळ्यावर वार केला.
झटापटीदरम्यान तिच्या दोन्ही हातांवरही वार होऊन ती गंभीर जखमी झाली. दरम्यान मुलगा गणेश व परिसरातील नागरिक जमा झाल्याने आरोपी घटनास्थळावरून पळून गेला. जखमी महिलेला अमळनेर ग्रामीण रुग्णालयात उपचारासाठी दाखल करण्यात आले. या प्रकरणी मा. जिल्हा न्यायाधीश-१ व अति. सत्र न्यायाधीश श्रीमती सी. व्ही. पाटील यांच्या न्यायालयाने भा.दं.वि. कलम ३०७ अंतर्गत आरोपी दोषी ठरवत ७ वर्षे सश्रम कारावास व दंडाची शिक्षा सुनावली. सरकारी पक्षाकडून अॅड. के. आर. बागुल यांनी ६ साक्षीदारांच्या साक्षी सादर करत प्रभावी युक्तिवाद केला.
