पोलीस अधीक्षक महेश्वर रेड्डी यांच्या आदेशाने, पोलीस उपअधीक्षक केदार बारबोले अमळनेर पोलीस स्टेशनचे प्रभारी
अमळनेर: विक्की जाधव.
अमळनेरमध्ये पोलीस अधीक्षक महेश्वर रेड्डी यांच्या आदेशानुसार, पोलीस उपअधीक्षक केदार प्रकाश बारबोले यांना अमळनेर पोलीस स्टेशनचा प्रभारी म्हणून नियुक्त करण्यात आले आहे. ते १७ फेब्रुवारी पासून ११ मार्च पर्यंत या पदाचा कार्यभार सांभाळतील.
केदार बारबोले यांचा हा परिविक्षाधीन कालावधी असून, या दरम्यान त्यांना ग्रामीण पोलीस ठाण्याचा अनुभव घेण्यासाठी संधी प्रदान करण्यात आली आहे. ते सद्याचे पोलीस निरीक्षक विकास देवरे यांच्याकडून पदभार स्वीकारतील.
विकास देवरे यांच्या सेवेतील फक्त १५ दिवस उरले असून, ते २८ फेब्रुवारी रोजी सेवानिवृत्त होणार आहेत. तोपर्यंत ते दुय्यम अधिकारी म्हणून आपले कर्तव्य पार पाडण्यास समर्पित राहतील.
यासोबतच, केदार बारबोले यांच्या नेतृत्वाखाली अमळनेर पोलीस स्टेशनमध्ये सुरक्षेच्या उपाययोजना अधिक प्रभावीपणे राबविण्यात येणार आहेत. स्थानिक समुदायाच्या सुरक्षेसाठी ह्या बदलाचा सकारात्मक परिणाम होईल, अशी आशा व्यक्त केली जात आहे.
याशिवाय, काही दिवसांपूर्वी बऱ्याच दिवसांपासून रिक्त असलेले उपविभागीय अधिकारी डी वाय यास पी पद हे विनायक कोते यांची नियुक्ती करून भरले गेले आहे. तें नागपूर शहराचे सहाय्यक पोलीस आयुक्त होते.
यापूर्वी, चोपड्याचे डीवायएसपी आबासाहेब घोलप यांना पदभार देण्यात आला होता. दोन विभागांचा पदभार सांभाळताना त्यांच्या कामावर ताण पडत होता, परंतु आता नवीन डीवायएसपीच्या नियुक्तीमुळे स्थानिक पोलिस प्रशासनाचा कारभार सुरळीत होईल, अशी अपेक्षा आहे.
या सर्व बदलांचा उद्देश स्थानिक गुन्हेविषयक अडचणींना तोंड देणे आणि सुरक्षेसाठी अधिक प्रभावी उपाययोजना राबविणे आहे.
