राष्ट्रवादी काँग्रेस महाविकास आघाडीचं सरकार टिकावण्यासाठी प्रयत्नशील- अजित पवार
(निलेश गायकवाड)
महाराष्ट्रात निर्माण झालेल्या राजकीय पेचप्रसंगात राष्ट्रवादी काँग्रेस महाविकास आघाडीचं सरकार टिकावं यासाठीच प्रयत्नशील आहे, आणि तीच आपल्या पक्षाची भूमिका असल्याचं उपमुख्यमंत्री आणि राष्ट्रवादीचे नेते अजित पवार यांनी म्हटलं आहे. ते आज मुंबईत बातमीदारांशी बोलत होते. आपल्या पक्षाच्या भूमिकेबद्दल आपण मुख्यमंत्री उद्धव ठाकरे यांच्याशी बोललो आहोत, आणि आपला पक्ष त्यांच्या पाठीशी असल्याचं त्यांनी सांगितलं.
घटक पक्षांना निधी देतांना आपण कधीही दुजाभाव केला नाही, विकास कामांमध्ये सगळ्यांनाच सहकार्य करण्याची भूमिका राहिली आहे, असं त्यांनी नाना पटोले यांनी केलेल्या वक्तव्याबद्दल प्रतिक्रिया देतांना सांगितलं. घटक पक्षांच्या काही तक्रारी असतील तर त्यांनी त्या माध्यमांमध्ये व्यक्त करण्याऐवजी परस्परांसोबतच्या चर्चेत मांडल्या तर गैरसमज दूर होऊ शकतील अशी अपेक्षा त्यांनी व्यक्त केली.
