पुणे जिल्हा बँक निवडणुकीने इंदापूरचे राजकारण तापले; भरणे-पाटील-जगदाळे एकाच व्यासपीठावर येणार?
(निलेश गायकवाड)
इंदापूर (प्रतिनिधी):- पुणे जिल्हा मध्यवर्ती सहकारी बँकेच्या निवडणुकीचे वेध लागल्याने इंदापूर तालुक्याच्या राजकारणात मोठी उलथापालथ सुरु झाली आहे. सहकार कायद्यात झालेल्या नवीन नियमानुसार ज्या संचालकांनी दहा वर्षे पद भूषवले आहे, त्यांना पुन्हा निवडणूक लढवता येणार नाही. या नियमामुळे इंदापूरमधील अनेक दिग्गज नेत्यांचे भवितव्य अडचणीत आले आहे.
या पार्श्वभूमीवर राष्ट्रवादीचे नेते दत्तात्रय भरणे आणि माजी मंत्री हर्षवर्धन पाटील यांच्यासह आमदार जगदाळे यांच्या गटाची नुकतीच एक महत्त्वाची बैठक झाली. या बैठकीत जिल्हा बँक निवडणुकीच्या रणनीतीवर चर्चा झाल्याची माहिती आहे.
चर्चेतील महत्त्वाचे मुद्दे:
१. सुनेत्रा पवारांच्या नेतृत्वाखाली एकत्र लढण्याची चर्चा: उपमुख्यमंत्री सुनेत्रा पवार यांच्या नेतृत्वाखाली ही निवडणूक लढवली जाणार असल्याची राजकीय वर्तुळात चर्चा आहे. त्यामुळे विरोधी गट एकत्र येण्याची शक्यता आहे.
२. ‘अ’ आणि ‘ब’ वर्गातील पेच: इंदापूर तालुक्यातून जिल्हा बँकेवर ‘अ’ वर्गातून विधानसभेचे संचालक तर ‘ब’ वर्गातून कृषी संस्थेचे संचालक निवडले जातात. भरणे आणि जगदाळे यापैकी कोणाला संधी मिळणार याकडे सर्वांचे लक्ष आहे. तर ‘क’ वर्गातून माजी मंत्री हर्षवर्धन पाटील यांचे नाव आघाडीवर आहे.
३. गारटकर, माने, घोलप यांची भूमिका काय?: भाजपचे नेते प्रदीप गारटकर आणि प्रवीण माने तसेच अविनाश घोलप आणि अॅड. पूजा घोलप हे देखील इच्छुक आहेत. त्यांनी अद्याप आपली भूमिका स्पष्ट केलेली नाही, मात्र त्यांनी अपक्ष म्हणून अर्ज भरल्यास भाजपसमोर मोठे आव्हान उभे राहणार आहे.
सहकाराच्या या निवडणुकीत पक्षीय सीमा बाजूला ठेवून नवीन समीकरण तयार होणार का? भरणे आणि पाटील हे पारंपरिक विरोधक एकत्र येणार का? हे येत्या काही दिवसात स्पष्ट होईल.
सध्या तरी इंदापूरच्या सहकार क्षेत्रात मोठी खळबळ उडाली असून सर्वांचे लक्ष पुणे जिल्हा बँकेच्या निवडणुकीकडे लागले आहे.
