“१२ वर्षांत सर्वांचे बारा वाजले!” “इतकी वर्षे सत्तेतहोतात नां” मग केले काय? मशाल मोर्चातून खा. स्मिता वाघ अनिल पा. यांच्यावर अशोक पवारांचा घणाघात
अमळनेर : विक्की जाधव.
९ ऑगस्ट क्रांतीदिनी अमळनेरात मशाल मोर्चाच्या माध्यमातून केंद्र व राज्य सरकारचा जाहीर निषेध करण्यात आला. “१२ वर्षांत सर्वांचे बारा वाजले” असा घणाघाती नारा देत मोर्चेकऱ्यांनी प्रशासन आणि शासनाला धारेवर धरले. विविध सामाजिक, राजकीय व विद्यार्थी संघटनांच्या सहभागाने निघालेल्या या मशाल मोर्चाने शहराचे लक्ष वेधून घेतले. यावेळी सत्ताधाऱ्यांच्या धोरणांवर तीव्र टीका करत जनतेने आता गप्प न बसता आपल्या हक्कांसाठी जाब विचारण्याची वेळ आली असल्याचा सूर उपस्थित वक्त्यांनी व्यक्त केला.
मोर्चाला संबोधित करताना अशोक पवार यांनी खासदार स्मिता वाघ आणि आमदार अनिल पाटील यांच्यावर घणाघाती प्रहार केला. “इतकी वर्षे तुम्ही सत्तेत आहात, मग जनतेसाठी काय केले?” असा प्रश्न करत त्यांनी डांगर गावाला अद्याप पाणी मिळत नसल्याचा मुद्दा उपस्थित केला.
“डॉ. बाबासाहेब आंबेडकरांनी आपल्याला अधिकार दिले आहेत; त्यामुळे आपल्या हक्कांसाठी जाब विचारला पाहिजे,” असे आवाहन त्यांनी केले. पडळसरे धरणाच्या वाढलेल्या खर्चाचा मुद्दा उपस्थित करत १४५ कोटींच्या धरणाचा खर्च हजारो कोटींपर्यंत पोहोचतोच कसा, असा सवाल करत यासाठी लोकप्रतिनिधींना जबाबदार धरले.
प्रहार पक्षाचे जिल्हाध्यक्ष शिवराम पाटील यांनी क्रांती दिनाच्या ऐतिहासिक महत्त्वाची आठवण करून देत क्रांतिसिंह नाना पाटील, लीलाताई पाटील यांच्या विचारांचा वारसा पुढे नेण्याचे आवाहन केले. “ही साने गुरुजींची पावन भूमी आहे; ही भूमी बिकानेर म्हणून ओळखली जाऊ नये,” अशी अपेक्षा व्यक्त करत त्यांनी जनतेला जागे होण्याचे आवाहन केले. स्वातंत्र्यपूर्व काळात काहीच नसताना संघर्षातून स्वातंत्र्य मिळवले, आज संसद, सत्ता आणि व्यवस्था असूनही सामान्य जनतेचे प्रश्न कायम आहेत, अशी खंत त्यांनी व्यक्त केली. पेपरफुटीच्या मुद्द्यावरही त्यांनी सरकारला लक्ष्य करत “दिल्लीत काठी चालली तर त्याचे दुःख अमळनेरात होते,” असे सांगत “लोकांनो, हो जागे व्हा!” असा एल्गार केला. यावेळी महाविकास आघाडी, नॅशनल युथ काँग्रेस, मराठा सेवा संघ, एनएसयूआय, विद्यार्थी सेना, संभाजी ब्रिगेड, भारत मुक्ती मोर्चा, पुरोगामी क्रांती दल, प्रहार संघटना यांच्यासह विविध संघटनांचे पदाधिकारी व कार्यकर्ते मोठ्या संख्येने उपस्थित होते.
