वाहतूक नियम मोडणाऱ्यांवर पोलिसांचा दणका; दीड महिन्यात ७७१ वाहनांवर कारवाई
अमळनेर : विक्की जाधव.
वाहतुकीचे नियम धाब्यावर बसवून वाहन चालवणाऱ्यांविरोधात अमळनेर विभागीय पोलिसांनी कठोर भूमिका घेतली असून गेल्या दीड महिन्यात अमळनेर, पारोळा, एरंडोल आणि मारवड परिसरात तब्बल ७७१ वाहनांवर कारवाई करण्यात आली आहे. या कारवाईतून ७ लाख ९२ हजार रुपयांचा दंड वसूल करण्यात आला. मद्यपान करून वाहन चालवणे, अवैध प्रवासी वाहतूक, हेल्मेटचा वापर न करणे, मोबाईलवर बोलत वाहन चालवणे, विरुद्ध दिशेने वाहन चालवणे तसेच वाहतुकीचे इतर नियम मोडणाऱ्यांवर ही कारवाई करण्यात आली. वाढत्या अपघातांच्या पार्श्वभूमीवर पोलिसांनी ही विशेष मोहीम राबविली आहे.
डीवायएसपी विनायक कोते यांनी नागरिकांना वाहतुकीचे नियम काटेकोरपणे पाळण्याचे आवाहन केले आहे. अपघातांमुळे अनेकांना जीव गमवावा लागतो, तर काहींना कायमस्वरूपी अपंगत्व येऊन कुटुंबांवर आर्थिक व मानसिक संकट कोसळते. त्यामुळे दंड हा शिक्षा देण्याचा नव्हे तर नागरिकांमध्ये शिस्त निर्माण करून अपघात रोखण्याचा प्रयत्न असल्याचे त्यांनी स्पष्ट केले. अवैध प्रवासी वाहतूक, कर्कश सायलेन्सर, दारू पिऊन वाहन चालवणे, भरधाव वेग आणि बेशिस्त पार्किंग करणाऱ्यांविरोधात यापुढेही कठोर कारवाई सुरूच राहणार असल्याचा इशाराही त्यांनी दिला.
