Gen Z ने उचलला मुद्दा “कॉकरोच इंडिया पार्टी”ची राजकीय एंट्री? देशात टॉपव्हायरल.
मार्मिक न्यूज नेटवर्क : विक्की जाधव.
देशभरात सध्या सोशल मीडियावर “कॉकरोच इंडिया पार्टी”ची जोरदार चर्चा रंगताना दिसत आहे. चीफ जस्टिस यांच्या एका विधानानंतर हा विषय इंटरनेटवर इतका व्हायरल झाला की काही तासांतच मीम्स, व्हिडिओ, रील्स आणि चर्चांचा अक्षरशः पूर आला. विशेष म्हणजे Gen Z पिढीने हा मुद्दा उचलून धरत त्याला भन्नाट क्रिएटिव्हिटीची जोड दिली आहे. “सिस्टममध्ये सर्वत्र कॉकरोच पसरलेत” अशा उपरोधिक टॅगलाईनसह सोशल मीडियावर हजारो पोस्ट व्हायरल होत असून अनेकांनी या “कॉकरोच India Party”ला काल्पनिक पण “जनतेचा आवाज” असे संबोधले आहे.
अवघ्या काही दिवसांत या पार्टीचे सोशल मीडिया प्लॅटफॉर्मवर तब्बल ८ मिलियनपेक्षा अधिक फॉलोअर्स झाल्याचा दावा केला जात आहे. त्यामुळे राजकीय वर्तुळात देखील या ट्रेंडची चर्चा सुरू झाली आहे. भाजपा, काँग्रेस आणि आम आदमी पक्ष यांच्यापेक्षा “कॉकरोच इंडिया पार्टी”ची डिजिटल लोकप्रियता झपाट्याने वाढत असल्याने अनेकांनी याकडे नव्या इंटरनेट क्रांतीच्या रूपात पाहायला सुरुवात केली आहे. सोशल मीडियावर “कॉकरोच फॉर चेंज”, “झाडू नाही, पंजा नाही, आता कॉकरोच भाई!” अशा भन्नाट घोषणा सुद्धा मोठ्या प्रमाणात ट्रेंड होत आहेत.
विशेष म्हणजे तरुण वर्गाने याला केवळ विनोदापुरते मर्यादित न ठेवता व्यवस्थेवरील नाराजी व्यक्त करण्याचे माध्यम बनवले आहे. बेरोजगारी, महागाई, भ्रष्टाचार आणि राजकीय आरोप-प्रत्यारोप यावर उपहासात्मक पोस्ट करत अनेक युवकांनी “कॉकरोच पार्टी”ला डिजिटल आंदोलनाचे स्वरूप दिले आहे. काही सोशल मीडिया इन्फ्लुएन्सर्सनी तर “२०२९ मध्ये कॉकरोच पार्टी सत्तेत येणार?” अशा चर्चांना देखील सुरुवात केली आहे. त्यामुळे हा ट्रेंड आता केवळ मीम्सपुरता मर्यादित न राहता चर्चेचा गंभीर विषय बनत चालला आहे.
दरम्यान, राजकीय विश्लेषकांच्या मते हा संपूर्ण प्रकार सोशल मीडियावरील जनमताचा बदलता चेहरा दर्शवणारा आहे. पारंपरिक राजकारणावर नाराजी व्यक्त करण्यासाठी इंटरनेटवरील तरुण वर्ग आता विनोद, मीम्स आणि ट्रेंडिंग मोहिमांचा प्रभावी वापर करत आहे. “कॉकरोच इंडिया पार्टी” ही वास्तविक राजकीय संघटना नसली तरी डिजिटल युगात सोशल मीडिया कोणत्याही मुद्द्याला किती मोठे रूप देऊ शकतो, याचे हे ताजे उदाहरण मानले जात आहे.
