शेतकरी, बेरोजगार युवा व महिलांच्या संवादासाठी “सुसंवाद पदयात्रा”आयोजन
अमळनेर : विक्की जाधव.
तालुक्यातील जनतेच्या प्रश्नांना थेट ऐकण्यासाठी आणि संवादातून उपाय शोधण्यासाठी “सुसंवाद पदयात्रा” 21 ते 24 ऑक्टोबर 2025 या कालावधीत कामतवाडी ते कपिलेश्वर मार्गावर आयोजित करण्यात आली आहे.
“हम चलेंगे हाथों में लेकर हाथ, अपनों से होंगी सपनों की बात” या घोषवाक्याखाली ही पदयात्रा शेतकरी, बेरोजगार युवक, आणि पिडीत महिलांच्या समस्यांवर प्रकाश टाकणार आहे.
या पदयात्रेत काँग्रेस कार्यकर्ते पायपीट करून लोकांपर्यंत पोहोचणार आहेत. तरुणांच्या रोजगाराच्या संधी, महिलांच्या सुरक्षितता व आरक्षणाविषयी संवाद साधला जाणार असून, शेतकऱ्यांच्या आस्मानी-सुलतानी संकटांवर चर्चा होणार आहे. प्रार्थना सभांच्या आयोजनातून सामूहिक उपाय शोधण्याचा हा प्रयत्न जनसामान्यांशी थेट नाळ जोडणारा ठरत आहे. शेतकऱ्यांची आत्महत्या, वाढती महागाई, आणि तरुणांच्या बेरोजगारीसारख्या मुद्द्यांवर वास्तववादी चर्चा करण्यात येणार आहे.
या सुसंवाद पदयात्रेद्वारे देशातील वाढती विषमता, माध्यमांचे व्यापारीकरण आणि संविधानिक संस्थांवरील हल्ले यासारख्या गंभीर प्रश्नांवर जनजागृती केली जाणार आहे. ही पदयात्रा जनतेच्या हितासाठी एक सशक्त लोकआंदोलन ठरण्याची चिन्हे आहेत.
