सर्पमित्रांच्या तत्परतेने दिले भल्या मोठ्या अजगराला जीवनदान, मारवड-भोरगाव परिसरात आढळून आला होता मोठा अजगर
अमळनेर : विक्की जाधव
मारवड भोरगाव येथे आज सकाळी गावकऱ्यांना भला मोठा सर्प दिसल्याची माहिती मिळताच परिसरात एकच खळबळ उडाली. तात्काळ सर्पमित्र दिपक चौधरी, राहुल अहिरे आणि भावेश साळुंखे हे घटनास्थळी दाखल झाले. त्यांनी सावधगिरी बाळगत सर्पाचे निरीक्षण केले असता, तो एक मोठा अजगर असल्याचे निदर्शनास आले.
सर्पमित्रांनी कोणतीही हानी न पोहोचवता अत्यंत काळजीपूर्वक त्या अजगराला सुरक्षितरीत्या पकडले. या अजगर जातीचा साप बिनविषारी असल्याने गावकऱ्यांना दिलासा मिळाला. सर्पमित्रांच्या संवेदनशील कृतीमुळे वन्यजीव संवर्धनाचे उत्तम उदाहरण साकारले गेले आहे.
या वेळी वनविभागाचे पिंजारी साहेब यांच्या मार्गदर्शनाखाली आणि अधिकाऱ्यांच्या उपस्थितीत त्या अजगराला जंगलात सुखरूप सोडण्यात आले सर्पमित्रांच्या या प्रयत्नाचे सर्वत्र कौतुक होत आहे.
