शताब्दी वर्षात संघाचा उत्साही विजयादशमी उत्सव
अमळनेर : विक्की जाधव.
विजयादशमी उत्सव हा राष्ट्रीय स्वयंसेवक संघाच्या सहा प्रमुख उत्सवांपैकी एक असून, यंदाही अमळनेर तालुक्यात भव्य पथसंचलन काढण्यात आले. संघाला यावर्षी शंभर वर्ष पूर्ण होत असल्याने या शताब्दी वर्षात विविध कार्यक्रमांची मालिका राबविण्यात येणार असल्याची माहिती संघ पदाधिकाऱ्यांनी दिली. म्हस्कर प्लॉट येथून सुरू झालेले हे पथसंचलन नेताजी सुभाष चौक, तिरंगा चौक, बस स्टँड, महाराणा प्रताप चौक मार्गे स्टेशन रोड होत पुन्हा म्हस्कर प्लॉट येथे परतले. या वेळी तिनशेहून अधिक स्वयंसेवक गणवेशात उपस्थित होते तर मंगलवेशात देखील अनेक स्वयंसेवक सहभागी झाले. संचलनाचे शिस्तबद्ध स्वरूप आणि घोषवाक्यांनी परिसर दुमदुमून गेला.
संचलनाचे नागरिकांकडून उत्स्फूर्त स्वागत करण्यात आले. मार्गात फटाक्यांची आतषबाजी, पुष्पवृष्टी आणि घोषणांनी वातावरण भारावून गेले. या शताब्दी वर्षाच्या पार्श्वभूमीवर अमळनेरातील विजयादशमी उत्सव ऐतिहासिक ठरल्याचे जिल्हा प्रचार प्रमुख डॉ. चंद्रकांत पाटील यांनी सांगितले.
