गणेशोत्सव व ईद-ए-मिलाद या सणांच्या पार्श्वभूमीवर अमळनेर पोलीस उपविभागाने “हैं तैयार हम” मॉकड्रिल व रूट मार्च आयोजित केला.
अमळनेर : विक्की जाधव
गणेशोत्सव व ईद-ए-मिलाद या दोनही प्रमुख सणांच्या पार्श्वभूमीवर अमळनेर पोलीस उपविभागाने “हैं तैयार हम” या संदेशासह शहरात मॉकड्रिल व रूट मार्च आयोजित केला. नागरिकांच्या सुरक्षिततेसाठी घेतलेल्या या सरावाला मोठा प्रतिसाद मिळाला. सकाळी ९.४५ ते ११.४५ या वेळेत डॉ. बाबासाहेब आंबेडकर चौक, गांधलीपुरा परिसरात ढाल, लाठी, गॅसगन, शिल्ड व ग्रेनेडसह दंगा काबू योजनेचे प्रात्यक्षिक घेण्यात आले.
या सरावात उपविभागीय पोलीस अधिकारी श्री. विनायक कोते, पोलीस निरीक्षक श्री. दत्तात्रय निकम तसेच जळगाव येथील कवायत निर्देशकांच्या मार्गदर्शनाखाली अधिकारी व अंमलदारांना प्रत्यक्ष प्रशिक्षण देण्यात आले. त्यानंतर शहरातील संवेदनशील भाग – आंबेडकर चौक, सुभाष चौक, बाजारपेठ, जामा मशीद, दगडी दरवाजा, सराफ बाजार आदी ठिकाणी पोलीस दलाने रूट मार्च काढला. त्यामुळे शहरभर शिस्तबद्धता व सुरक्षिततेचा संदेश पोहोचला. या मोहिमेत अमळनेर, मारवड, पारोळा व एरंडोल पोलीस स्टेशनचे अधिकारी-अंमलदार, दंगा नियंत्रण पथक, स्ट्रायकिंग फोर्स आणि ६२ होमगार्ड सहभागी झाले होते. नागरिकांनी उत्स्फूर्त स्वागत करून पोलिसांना सहकार्य केले. त्यामुळे अमळनेर शहरात कायदा व सुव्यवस्थेच्या दृढतेसह एकात्मतेचा भाव अधिकच बळकट झाल्याचे दृश्य पाहायला मिळाले.
