करमाळा प्रतिनिधी :- करमाळा पोलिस स्टेशन च्या वतीने सन २०२४ मध्ये घेण्यात आलेल्या गणेशोत्सव स्पर्धेचा निकाल आज पंचायत समिती हॉल करमाळा येथे जाहीर करण्यात आला. यावेळी पोलीस उपविभागीय अधिकारी अजित पाटील यांच्या हस्ते व पोलीस निरीक्षक विनोद घुगे, मुख्याधिकारी सचिन तपसे, वैदयकीय अधिकारी गजानन गुंजकर, भूमी अभिलेख अधिकारी प्रिया पाटील, नायब तहसीलदार, सहाय्यक निबंधक, इ. मान्यवरांच्या उपस्थितीत बक्षिसे देण्यात आली.
यावेळी करमाळा शहरामधून तीन क्रमांक काढले असून प्रथम क्रमांक हा छत्रपती शिवाजी महाराज तरुण मंडळ सावंत गल्ली यांना देण्यात आला तर द्वितीय क्रमांक राशीन पेठ तरुण मंडळाला देण्यात आला तर तृतीय क्रमांक हा किल्ला विभाग येथील लोकमान्य टिळक तरुण मंडळाला देण्यात आला आहे.
किल्ला विभागातील लोकमान्य टिळक तरुण मंडळाने दहा दिवस उत्कृष्ट कार्यक्रम राबवून शोध माणुसकीचा या विषयांतर्गत गो हत्या करू नका हा जिवंत देखावा मंडळातील पदाधिकारी व सदस्य यांनी पुढाकार घेऊन स्वत: सादर केला होता. सदर देखावा पाहतेवेळी आलेले नागरिक भावुक होताना पाहायला मिळत होते तर ठिकठिकाणी या देखाव्याची जोरदार चर्चा सुरु होती. या देखाव्यासाठी मंडळाला दयाळ बंधूचे अनमोल सहकार्य मिळाले होते.
मंडळाने राबविलेले सामाजिक उपक्रम व देखाव्या बाबत करमाळा पोलीस स्टेशनच्या वतीने तृतीय क्रमांक देण्यात आला असून मिळालेल्या यशाबद्दल लोकमान्य टिळक तरुण मंडळामध्ये आनंदाचे वातावरण निर्माण झाले आहे.
