सोशल मीडियावरील व्हिडिओची पोलिसांनी घेतली स्वतःहून दखल; तडीपार आरोपीविरुद्ध गुन्हा दाखल
तडीपार आरोपींच्या हालचालींवर पोलिसांची करडी नजर; नागरिकांना ११२ वर माहिती देण्याचे आवाहन
बारामती, प्रतिनिधी – वर्षा चव्हाण
तडीपार आदेश अस्तित्वात असतानाही प्रतिबंधित क्षेत्रात प्रवेश करून फॉर्च्युनर वाहनातून सार्वजनिक ठिकाणी वावरत नागरिकांमध्ये दहशत निर्माण करण्याचा प्रयत्न केल्याचा प्रकार समोर आला आहे. सोशल मीडियावर प्रसारित झालेल्या व्हिडिओची बारामती शहर पोलिसांनी स्वतःहून दखल घेत तडीपार आरोपी अक्षय उर्फ सोन्या भिमराव कांबळे याच्याविरुद्ध गुन्हा दाखल केला आहे. या कारवाईनंतर बारामती शहर पोलिसांनी तडीपार आरोपींच्या हालचालींवर लक्ष ठेवण्यासाठी चेकिंग मोहीम अधिक तीव्र करण्याचे आदेश दिले आहेत.
अक्षय उर्फ सोन्या भिमराव कांबळे हा तडीपार असतानाही बारामती शहर पोलीस ठाण्याच्या हद्दीत आल्याचे आणि Toyota Fortuner क्रमांक MH-42-BN-9786 या वाहनातून इतर साथीदारांसह सार्वजनिक रस्त्यावर वावरल्याचे सोशल मीडियावरील व्हिडिओतून प्रथमदर्शनी निदर्शनास आले. या प्रकारामुळे नागरिकांमध्ये भीती निर्माण करण्याचा प्रयत्न झाल्याचे पोलिसांनी म्हटले आहे.
🟤फॉर्च्युनरच्या टपावर बसून हातवारे
दि. ८ सप्टेंबर रोजी दुपारी सुमारे २ वाजता Instagram वरील “rahul267586” या अकाउंटवर एक व्हिडिओ प्रसारित झाला. या व्हिडिओमध्ये संबंधित फॉर्च्युनर वाहन सार्वजनिक रस्त्यावरून जात असताना काही इसम वाहनाच्या टपावर तसेच वाहनाच्या बाहेरील भागावर बसलेले दिसून येतात.
यातील काही जण रस्त्यावरील नागरिकांकडे हातवारे आणि इशारे करीत असल्याचे, तर एका इसमाने वाहनाच्या पाठीमागील उजव्या खिडकीतून शरीराचा भाग बाहेर काढून हातवारे केल्याचे व्हिडिओमध्ये दिसत असल्याचे पोलिसांनी सांगितले. या प्रकारामुळे काही नागरिक रस्त्याच्या बाजूला होत असल्याचे तसेच काही वाहनचालकांनी सुरक्षिततेच्या कारणास्तव आपली वाहने बाजूला घेतल्याचे प्रथमदर्शनी निदर्शनास आले.
सोशल मीडियावर व्हिडिओ समोर आल्यानंतर पोलिसांनी त्याची गांभीर्याने दखल घेत व्हिडिओतील व्यक्तींची ओळख पटविण्याची प्रक्रिया सुरू केली.
🔵तडीपार आरोपीची ओळख पटली
व्हिडिओतील इसमांची पडताळणी केली असता त्यापैकी एक जण अक्षय उर्फ सोन्या भिमराव कांबळे असल्याचे प्रथमदर्शनी स्पष्ट झाले. कांबळे याच्यावर सक्षम प्राधिकाऱ्याने २४ महिन्यांसाठी तडीपारीचा आदेश दिलेला आहे.
त्याला संपूर्ण पुणे जिल्हा, पुणे शहर व पिंपरी-चिंचवड पोलीस आयुक्तालयाची हद्द तसेच सातारा जिल्ह्यातील फलटण तालुका या क्षेत्रातून तडीपार करण्यात आले आहे. त्याची तडीपारीची मुदत १८ जानेवारी २०२५ ते १७ जानेवारी २०२७ अखेरपर्यंत आहे.
म्हणजेच तडीपारीचा आदेश अद्याप लागू असतानाच तो प्रतिबंधित क्षेत्रात आल्याचे पोलिसांच्या निदर्शनास आले आहे.
🔸नागरिकांच्या तक्रारीची वाट न पाहता पोलिसांची कारवाई
या घटनेची माहिती समोर आल्यानंतर बारामती शहर पोलीस ठाण्याचे प्रभारी पोलीस निरीक्षक श्रीशैल चिवडशेट्टी यांनी तातडीने दखल घेतली. संबंधित व्यक्तींची ओळख पटविणे, सोशल मीडियावरील व्हिडिओची पडताळणी करणे, उपलब्ध डिजिटल पुरावे तपासणे आणि दोषींविरुद्ध कायदेशीर कारवाई करण्याच्या सूचना तपास पथकाला देण्यात आल्या.
विशेष म्हणजे, या प्रकाराबाबत एखाद्या नागरिकाने स्वतंत्र तक्रार दाखल करण्याची वाट न पाहता पोलिसांनी स्वतःहून कारवाई केली. पोलीस शिपाई गिरीश नेवसे यांनी सरकारतर्फे फिर्याद दिल्यानंतर बारामती शहर पोलीस ठाण्यात गुन्हा रजिस्टर क्रमांक ३७२/२०२६ दाखल करण्यात आला.
या गुन्ह्यात भारतीय न्याय संहिता, २०२३ मधील कलम २८१, २८५ तसेच मोटार वाहन अधिनियम, १९८८ मधील कलम १२३(१), १२३(२), १८४ अन्वये कारवाई करण्यात आली आहे. तसेच तडीपार आदेशाचे उल्लंघन केल्याप्रकरणी महाराष्ट्र पोलीस अधिनियमातील लागू तरतुदींनुसार स्वतंत्र कायदेशीर कारवाई करण्यात येत आहे.
🟣सोन्या कांबळेविरुद्ध यापूर्वीही गंभीर गुन्ह्यांची नोंद
पोलिसांच्या अभिलेखानुसार अक्षय उर्फ सोन्या भिमराव कांबळे याच्याविरुद्ध यापूर्वीही गंभीर स्वरूपाचे गुन्हे दाखल आहेत.
बारामती शहर पोलीस ठाण्यातील गु.र.नं. ३७६/२०२२ मध्ये भारतीय दंड विधानातील कलम ३०७, ३२४, १४३, १४७, ५०४, ५०६ अन्वये गुन्हा दाखल आहे. तसेच गु.र.नं. ९५५/२०२३ मध्ये कलम ३०७, ३२३, १४३, १४७, १४८, १४९, ५०४, ५०६ अन्वये गुन्ह्याची नोंद आहे.
याशिवाय गु.र.नं. ५४१/२०२४ मध्ये भारतीय न्याय संहितेतील कलम ३३३, ११५(२), ३५२, ३५१(२), ३५१(३) तसेच बारामती तालुका पोलीस ठाण्यातील गु.र.नं. ५५१/२०२४ मध्ये भारतीय न्याय संहितेतील कलम १०९, ११८(१), ३३३, ११५(२), ३५२, ३(५) अन्वये गुन्ह्यांची नोंद असल्याचे पोलिसांनी नमूद केले आहे.
🟤तडीपार आरोपींच्या चेकिंगला वेग
या घटनेनंतर बारामती शहर पोलीस ठाण्याच्या हद्दीत तडीपार आरोपींच्या हालचालींवर अधिक प्रभावीपणे लक्ष ठेवण्याचे आदेश प्रभारी पोलीस निरीक्षक श्रीशैल चिवडशेट्टी यांनी सर्व तपास पथकांना दिले आहेत.
गोपनीय बातमीदार, नियमित पेट्रोलिंग, तडीपार आरोपींची ज्ञात वास्तव्याची ठिकाणे तसेच उपलब्ध कायदेशीर आणि तांत्रिक माहितीच्या आधारे संबंधित व्यक्ती प्रतिबंधित क्षेत्रात परत आल्या आहेत का, याची सातत्याने पडताळणी करण्याच्या सूचना देण्यात आल्या आहेत.
🔷बारामती शहर पोलीस ठाण्याच्या अभिलेखानुसार विशेष निगराणीखाली असलेल्या तडीपार व्यक्तींमध्ये धीरज रविंद्र पडकर, अमोल भिमराव कांबळे, तुषार उर्फ चिंट्या मारुती सोनवणे, अक्षय उर्फ सोन्या भिमराव कांबळे, वैभव बगाडे, अक्षय सोनवणे आणि निलेश उमरदंड यांचा समावेश आहे.
संबंधित प्रत्येक तडीपार व्यक्तीच्या आदेशातील प्रतिबंधित क्षेत्र आणि तडीपारीची मुदत लक्षात घेऊन त्यांच्या उपस्थितीची पडताळणी केली जात आहे.
🔴तडीपार आरोपी दिसल्यास पोलिसांना कळवा
दरम्यान, बारामती शहर पोलिसांनी नागरिकांना विशेष आवाहन केले आहे. तडीपार आरोपी शहरात किंवा प्रतिबंधित क्षेत्रात दिसल्यास नागरिकांनी स्वतः त्याच्याशी वाद घालू नये, त्याचा पाठलाग करू नये अथवा त्याला पकडण्याचा प्रयत्न करू नये.
संबंधित व्यक्ती कुठे दिसली, कोणत्या वाहनातून आली, कोणासोबत आहे किंवा कोणत्या ठिकाणी थांबली आहे, एवढी शक्य तितकी अचूक माहिती पोलिसांना तातडीने द्यावी.
तडीपार आरोपी दिसताच नागरिकांनी डायल ११२ वर संपर्क साधावा किंवा बारामती शहर पोलीस ठाण्याचे प्रभारी पोलीस निरीक्षक श्रीशैल चिवडशेट्टी यांना थेट माहिती द्यावी. माहिती मिळताच जवळचे पोलीस पथक संबंधित ठिकाणी रवाना करून कायदेशीर कारवाई केली जाईल, असे पोलिसांनी स्पष्ट केले आहे.
🟡“नागरिकांनी घाबरू नये; पोलिसांना माहिती द्यावी”
प्रभारी पोलीस निरीक्षक श्रीशैल चिवडशेट्टी यांनी नागरिकांना आवाहन करताना तडीपार आरोपी कितीही गंभीर गुन्हेगारी पार्श्वभूमीचा असला तरी नागरिकांनी घाबरण्याची आवश्यकता नसल्याचे स्पष्ट केले आहे.
“तडीपार आरोपी दिसल्यास त्याचे ठिकाण पोलिसांना कळवा. नागरिकांनी स्वतः कोणताही धोका पत्करू नये. संबंधित आरोपीला शोधून कायद्यापुढे आणण्याची जबाबदारी पोलिसांची आहे. बारामतीच्या सामान्य नागरिकाला गुन्हेगाराच्या भीतीने रस्ता बदलावा लागू नये, ही आमची स्पष्ट भूमिका आहे,” असे चिवडशेट्टी यांनी सांगितले.
तसेच पोलिसांना माहिती देणाऱ्या नागरिकांची ओळख आणि आवश्यक संपर्काची माहिती कायद्यानुसार गोपनीय ठेवण्यात येईल. त्यामुळे कोणतीही भीती किंवा दबाव न बाळगता नागरिकांनी पोलिसांना माहिती द्यावी, असे आवाहन करण्यात आले आहे.
🟢तपास पथकाकडून डिजिटल पुराव्यांची पडताळणी
या संपूर्ण कारवाईमध्ये सोशल मीडियावरील व्हिडिओची पडताळणी, व्हिडिओतील व्यक्तींची ओळख, पोलिस अभिलेखांची तपासणी आणि पुढील कायदेशीर कारवाई या सर्व बाबींमध्ये तपास पथकाने समन्वयाने काम केले.
ही कारवाई प्रभारी पोलीस निरीक्षक श्रीशैल चिवडशेट्टी यांच्या नेतृत्वाखाली सहाय्यक पोलीस निरीक्षक शशिकांत इंगवले, पोलीस हवालदार ज्ञानदेव क्षीरसागर, पोलीस हवालदार यशवंत पवार, पोलीस शिपाई गिरीश नेवसे, महिला पोलीस शिपाई भाग्यश्री देवकाते, पोलीस हवालदार उदय टापरे, पोलीस शिपाई अक्षय सिताफ आणि पोलीस हवालदार रामचंद्र शिंदे यांच्या पथकाने केली.
या गुन्ह्याचा पुढील तपास सहाय्यक पोलीस निरीक्षक शशिकांत इंगवले करीत आहेत.
संपूर्ण कारवाई पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली तसेच प्रभारी पोलीस निरीक्षक श्रीशैल चिवडशेट्टी यांच्या नेतृत्वाखाली बारामती शहर पोलीस ठाण्याच्या तपास पथकाने केली.
“माहिती तुमची, गोपनीयता आमची, कारवाई बारामती शहर पोलिसांची.”
तडीपार आदेशाचे उल्लंघन करून शहरात परत येणाऱ्या व्यक्तींविरुद्ध यापुढेही कठोर कारवाई केली जाईल, असा स्पष्ट संदेश या कारवाईतून बारामती शहर पोलिसांनी दिला आहे.
