ठेकेदार निष्काळजी कामाने हिरावला पोलिस कर्मचाऱ्याचा जीव?..
मारवड पोलिस ठाण्यातील भरत गायकवाड यांचा दुर्दैवी मृत्यू; ठेकेदार उमेश शहा सह जबाबदारांवर कारवाईची मागणी
अमळनेर : विक्की जाधव.
पिंपळे रोड व ८० फुटी डीपी रस्त्याच्या क्रॉसिंगदरम्यान सुरू असलेल्या मात्र अपूर्ण अवस्थेत असलेल्या रस्त्याच्या कामामुळे मारवड पोलिस ठाण्यात कार्यरत पोलिस कर्मचारी भरत गायकवाड यांचा दुर्दैवी मृत्यू झाल्याची घटना समोर आली आहे. गायकवाड हे ८० फुटी मार्गाने धुळे रोडकडून मोटारसायकलने येत असताना पिंपळे रस्त्याच्या क्रॉसिंगजवळ रस्त्याचे काम अपूर्ण असल्याने मोटारसायकलसह नाल्यात कोसळल्याचे प्राथमिक माहितीतून समोर आले आहे. सकाळी फिरण्यासाठी बाहेर पडलेल्या नागरिकांच्या निदर्शनास ही घटना आल्यानंतर पोलिसांना माहिती देण्यात आली.
या घटनेने शहरातील अपूर्ण व असुरक्षित रस्त्यांच्या कामांचा प्रश्न पुन्हा ऐरणीवर आला आहे. बांधकाम सुरू असलेल्या ठिकाणी नागरिकांच्या सुरक्षेसाठी आवश्यक बॅरिकेडिंग, सूचना फलक अथवा सुरक्षित पर्यायी मार्गाची व्यवस्था होती का, याची चौकशी होणे गरजेचे आहे. गायकवाड यांच्या मृत्यूचे नेमके कारण अधिकृत चौकशीनंतर स्पष्ट होणार असले तरी, अपूर्ण रस्त्यामुळे अपघातास कारणीभूत परिस्थिती निर्माण झाली का, याचा तपास करण्याची मागणी नागरिकांकडून होत आहे.
एक निष्पाप जीव गेला, आता तरी प्रशासन जागे होणार का?
या घटनेची सखोल चौकशी करून रस्त्याचे काम करणारे ठेकेदार उमेश शहा तसेच संबंधित जबाबदार व्यक्तींची भूमिका तपासावी आणि दोष आढळल्यास नियमानुसार कठोर कारवाई करावी, अशी मागणी जोर धरू लागली आहे.
विकासकामे नागरिकांच्या सोयीसाठी असतात; मात्र तीच कामे सुरक्षा उपायांशिवाय केली गेली तर ती जीवघेणी ठरू शकतात, हे या घटनेने पुन्हा अधोरेखित केले आहे.
