अमळनेर : विक्की जाधव.
शहराला पुरवठा करणारी बोरी नदीवरील मुख्य जलवाहिनी पुराच्या प्रचंड प्रवाहात तुटल्याने अमळनेर शहरातील पाणीपुरवठा पूर्णपणे विस्कळीत झाला आहे. सुरुवातीला दोन ते तीन दिवसांत परिस्थिती पूर्ववत होईल, असा दावा नगरपरिषदेकडून करण्यात आला होता. मात्र आता नगराध्यक्ष डॉ. परीक्षित बाविस्कर यांनी पत्रकार परिषदेतच पाणीपुरवठा पूर्णपणे सुरळीत होण्यासाठी आणखी 15 दिवसांचा कालावधी लागणार असल्याची स्पष्ट कबुली दिली आहे. तोपर्यंत शहरातील सर्व भागांना रोटेशन पद्धतीने केवळ एक तास पाणीपुरवठा केला जाणार असल्याचे त्यांनी सांगितले.
ज्या भागांमध्ये पाणी पोहोचत नाही किंवा अत्यल्प दाबाने येत आहे, त्या भागांसाठी टँकरद्वारे पाणीपुरवठा करण्याची मागणी अमळनेर शहर व तालुका पत्रकार संघाने केली. त्यावर नगरपरिषदेने गरजेनुसार टँकरची व्यवस्था करण्याबाबत सकारात्मक भूमिका घेतली. दरम्यान, नागरिकांनी उपलब्ध पाण्याचा काटकसरीने वापर करावा, असे आवाहन मुख्याधिकाऱ्यांनी केले.
पत्रकार परिषदेत पाणीपुरवठा अभियंता सत्यम पाटील यांनी संबंधित पाइपलाईन “तात्पुरत्या स्वरूपाची” असल्याचे सांगितले. याच विधानामुळे नव्या वादाला तोंड फुटले आहे. कारण, तात्पुरत्या पाइपलाईनसाठी तब्बल एक कोटी रुपयांचा खर्च करण्याचे नियोजन होत असल्याने नागरिकांकडून तीव्र प्रश्न उपस्थित केले जात आहेत. जर ही व्यवस्था तात्पुरतीच असेल, तर एवढ्या मोठ्या निधीचा वापर कितपत योग्य, असा सवाल शहरात चर्चेचा विषय ठरत आहे.
नगराध्यक्ष डॉ. परीक्षित बाविस्कर यांनी मुंबईहून 50 नवीन पाइप मागवण्यात आल्याची माहिती देत, पाइपलाईन जोडण्याचे काम तांत्रिकदृष्ट्या अत्यंत अवघड असल्याने दोन पथके रात्रंदिवस कार्यरत असल्याचे सांगितले. डीपीडीसीमधून एक कोटी रुपयांचा निधी मंजूर झाला असून शक्य तितक्या लवकर पाणीपुरवठा सुरळीत करण्यासाठी प्रयत्न सुरू असल्याचे त्यांनी स्पष्ट केले.
मात्र प्रस्तावित पाइप लाईनसाठी वापरण्यात येणाऱ्या पाईप चा गेज बारीक असून ती पुलावरून टाकण्याचा विचार होत असल्याची माहिती समोर आल्यानंतर अनेक गंभीर प्रश्न निर्माण झाले आहेत.
भविष्यात एखाद्या अवजड वाहनाच्या धडकेत पाइपलाईन फुटली, तर त्याची जबाबदारी कोण घेणार? वाहतुकीसाठी बांधलेल्या पुलावर पाणीपुरवठ्याची पाइपलाईन कितपत सुरक्षित राहील? सार्वजनिक बांधकाम विभाग (PWD) अशा तांत्रिक अडचणींवर कोणत्या निकषांवर परवानगी देणार? आणि पुन्हा पाइपलाईन फुटल्यास नव्याने ठेके व खर्चाचे चक्र सुरू होणार का? अशा प्रश्नांची स्पष्ट उत्तरे मिळणे आता गरजेचे असल्याची भावना अमळनेरकर व्यक्त करत आहेत.
