लेआउट मंजुरीशिवाय प्लॉट विक्री करणाऱ्यांनो सावधान..!
मार्मिक न्यूज नेटवर्क : विक्की जाधव.
आता थेट फौजदारी गुन्हे दाखल; महसूल मंत्री बावनकुळे यांचा कडक इशारा
राज्यात लेआउट मंजुरी न घेता सर्रास प्लॉट विक्री करणाऱ्या डेव्हलपर्स आणि भू-माफियांवर आता सरकारने कठोर भूमिका घेतली असून, अशा प्रकरणांमध्ये थेट फौजदारी गुन्हे दाखल करण्यात येणार असल्याचा इशारा महसूल मंत्री Chandrashekhar Bawankule यांनी दिला आहे. अनेक ठिकाणी नागरिकांची फसवणूक करून बेकायदेशीर प्लॉट विक्री होत असल्याच्या तक्रारी वाढल्यानंतर शासन आता अॅक्शन मोडमध्ये आले आहे.
विशेषतः ग्रामीण आणि शहरालगतच्या भागात लेआउट मंजुरी, रस्ता, पाणी, वीज आणि इतर मूलभूत सुविधांचे कोणतेही अधिकृत नियोजन नसताना मोठमोठे फलक लावून प्लॉट विक्री केली जात असल्याचे प्रकार समोर आले आहेत. स्वस्त दर आणि आकर्षक आश्वासनांच्या जाळ्यात अडकून अनेक सामान्य नागरिक आयुष्याची बचत गमावत आहेत. आता अशा डेव्हलपर्सवर महसूल विभाग, नगररचना विभाग आणि स्थानिक प्रशासन संयुक्त कारवाई करणार असून, थेट गुन्हे नोंदवून मालमत्ता जप्तीचीही कारवाई होण्याची शक्यता व्यक्त केली जात आहे.
महसूल मंत्र्यांच्या या इशाऱ्यानंतर राज्यभरातील अनधिकृत लेआउट व्यवसायिकांमध्ये मोठी खळबळ उडाली आहे. “आधी मंजुरी… मगच विक्री” हा नियम कठोरपणे लागू केला जाणार असल्याचे संकेत मिळत असून, नागरिकांनी कोणताही प्लॉट खरेदी करण्यापूर्वी अधिकृत मंजुरीची खात्री करूनच व्यवहार करावा, असे आवाहन प्रशासनाकडून करण्यात येत आहे. शासनाच्या या भूमिकेमुळे सर्वसामान्यांची फसवणूक थांबेल, अशी अपेक्षा व्यक्त केली जात आहे.
