चीज अॅनालॉग वापराबाबत ग्राहकांना स्पष्ट माहिती देणे बंधनकारक
पुणे/प्रतिनिधी – वर्षा चव्हाण
अन्न व औषध प्रशासनाने राज्यातील सर्व रेस्टॉरंट, हॉटेल्स, केटरर्स तसेच फास्ट फूड विक्रेत्यांना अन्नपदार्थांमध्ये वापरल्या जाणाऱ्या “चीज अॅनालॉग” बाबत ग्राहकांना स्पष्ट व पारदर्शक माहिती देण्याचे निर्देश दिले आहेत. ग्राहकांची फसवणूक टाळण्यासाठी हा निर्णय घेण्यात आला आहे.
अन्न सुरक्षा व मानके कायदा 2006 नुसार ग्राहकांना अन्नातील घटकांची अचूक माहिती मिळणे आवश्यक आहे. पनीर हे शुद्ध दुधापासून तयार केले जाते, तर चीज अॅनालॉग हे खाद्यतेल, स्टार्च व इतर घटकांपासून बनविले जाते. त्यामुळे दोन्हींच्या पोषणमूल्यांमध्ये व स्वरूपात फरक असतो.
प्रशासनाच्या निर्देशानुसार, चीज अॅनालॉग वापरून तयार केलेल्या पदार्थांचा स्पष्ट उल्लेख बिलावर करणे बंधनकारक आहे. तसेच मेन्यू कार्ड आणि इलेक्ट्रॉनिक डिस्प्ले बोर्डवरही याबाबत माहिती देणे आवश्यक राहील. उत्पादक व पुरवठादारांनी विक्री बिलावर “डेअरी/चीज अॅनालॉग” असा स्पष्ट उल्लेख करणेही आवश्यक करण्यात आले आहे.
अन्न व औषध प्रशासनाने स्पष्ट केले आहे की चीज अॅनालॉग आरोग्यास अपायकारक नाही, मात्र त्यातील घटक व पोषणमूल्ये पनीरपेक्षा भिन्न असतात. त्यामुळे ग्राहकांनी पॅकबंद उत्पादनांवरील लेबल तपासावे, सुटे पनीर खरेदी करताना खात्री करून बिल घ्यावे आणि हॉटेलमध्ये पनीर व चीज अॅनालॉग यांचा स्वतंत्र उल्लेख आहे का, याची पडताळणी करावी.
या नियमांचे उल्लंघन करणाऱ्या उत्पादक, पुरवठादार आणि खाद्य व्यवसायिकांवर अन्न सुरक्षा व मानके अधिनियम 2006 अंतर्गत कठोर कारवाई करण्यात येणार असल्याचा इशारा प्रशासनाने दिला आहे.
ग्राहकांची दिशाभूल झाल्यास त्यांनी तक्रार नोंदविण्यासाठी प्रशासनाच्या 1800-222-365 या टोल-फ्री क्रमांकाचा वापर करावा, असे आवाहन सह आयुक्त (अन्न), अन्न व औषध प्रशासन, पुणे यांनी केले आहे.
