अमळनेर नगरपरिषदेत अंतिम प्रभाग रचना जाहीर
अमळनेर : विक्की जाधव
शहराच्या प्रभाग रचनेत अखेर अंतिम निर्णय घेण्यात आला असून दोन प्रभागांमध्ये किरकोळ बदल करण्यात आले आहेत. वाडी चौक परिसरातील नागरिकांच्या हरकतींवर उपविभागीय अधिकारी नितीनकुमार मुंडावरे आणि मुख्याधिकारी तुषार नेरकर यांनी सुनावणी घेतल्यानंतर आयोगाकडे अहवाल पाठविला होता. त्यानुसार ३० सप्टेंबर रोजी राज्य निवडणूक आयोगाने अंतिम प्रभाग रचना जाहीर केली.
या बदलांमध्ये वाडी चौक परिसराचा प्रभाग १२ मधून वगळून प्रभाग १० मध्ये समावेश करण्यात आला आहे. तसेच नदीकाठावरील बेलदार मोहल्ल्याचा काही भाग प्रभाग १० मधून वगळून नव्या प्रभाग ४ मध्ये जोडण्यात आला आहे. या फेरबदलांमुळे शहरातील मतदान केंद्रांची संख्या १०८ पर्यंत वाढण्याची शक्यता आहे.
दरम्यान, राज्य निवडणूक आयोगाने २८९ नगरपालिकांसाठी मतदार यादी कार्यक्रमही जाहीर केला आहे. ८ ऑक्टोबर रोजी प्रारूप मतदार यादी प्रसिद्ध होणार असून ८ ते १३ ऑक्टोबर दरम्यान नागरिकांना हरकती नोंदवण्याची संधी दिली जाणार आहे. २८ ऑक्टोबर रोजी अंतिम मतदार यादी जाहीर केली जाईल. त्यानंतर ७ नोव्हेंबरला मतदान केंद्रनिहाय मतदार यादी प्रकाशित होईल. याच काळात नगराध्यक्ष आणि प्रभाग आरक्षण सोडतही होण्याची दाट शक्यता आहे.
या संपूर्ण प्रक्रियेसाठी १ जुलै २०२५ च्या विधानसभेच्या मतदार यादीला अंतिम आधार मानण्यात आले आहे.
