भिगवण शहर नाभिक संघटनेच्या नेतृत्वाची धुरा प्रकाश दळवी यांच्याकडे
(निलेश गायकवाड )
भिगवण, ता. इंदापूर – महाराष्ट्र नाभिक महामंडळ अंतर्गत भिगवण शहर कार्यकारिणीची महत्त्वपूर्ण बैठक नुकतीच संपन्न झाली. या बैठकीत आगामी काळातील संघटनात्मक वाटचाल आणि समाजहिताच्या उपक्रमांवर सखोल चर्चा झाली. चर्चेअंती शहराध्यक्ष पदासाठी सामाजिक क्षेत्रात सक्रिय असलेले प्रकाश दळवी यांची सर्वानुमते निवड जाहीर करण्यात आली.
निवड प्रक्रिया पारदर्शक पद्धतीने पार पडली. समाजातील ज्येष्ठ मार्गदर्शक आणि युवा कार्यकर्त्यांनी दळवी यांच्या नावाला एकमुखी पाठिंबा दिला.
प्रकाश दळवी हे केवळ व्यवसायापुरते मर्यादित न राहता, अनेक वर्षांपासून नाभिक समाजाच्या चळवळीत अग्रेसर आहेत. समाज प्रबोधन, युवकांचे संघटन आणि शासनाच्या विविध योजनांचा लाभ समाज बांधवांपर्यंत पोहोचवण्यासाठी त्यांनी सातत्याने प्रयत्न केले आहेत. याच कामाची पोचपावती म्हणून त्यांना ही मोठी जबाबदारी देण्यात आली आहे.
“सर्वांना सोबत घेऊन काम करणार”
सत्काराला उत्तर देताना नवनिर्वाचित शहराध्यक्ष प्रकाश दळवी म्हणाले, “ही निवड माझी वैयक्तिक नसून संपूर्ण नाभिक समाजाच्या विश्वासाची आहे. शहरातील प्रत्येक नाभिक बांधवाच्या सुख-दुःखात सहभागी होईन. समाजातील विद्यार्थ्यांसाठी शैक्षणिक मार्गदर्शन, केशकर्तनालय व्यावसायिकांच्या अडीअडचणी आणि शासकीय महामंडळाच्या योजना यावर प्रभावीपणे काम करणार आहे.”
या बैठकीस तालुक्यातील आणि शहरातील नाभिक समाजाचे पदाधिकारी, ज्येष्ठ नागरिक व मोठ्या संख्येने समाज बांधव उपस्थित होते. सर्वांनी टाळ्यांच्या गजरात दळवी यांचे अभिनंदन करत पुढील वाटचालीस शुभेच्छा दिल्या.
