पुणे ग्रामीण पोलीस दलाच्या माळेगाव पोलिसांची धडाकेबाज कारवाई; 26 गुन्ह्यांतील आरोपीच्या मुसक्या आवळल्या
माळेगाव/प्रतिनिधी – वर्षा चव्हाण
पुणे ग्रामीण पोलिसांच्या माळेगाव पोलीस ठाण्याने एका धाडसी आणि थरारक कारवाईत तब्बल 26 गंभीर गुन्ह्यांमध्ये आरोपी असलेल्या सराईत गुन्हेगाराला अटक केली आहे. आरोपीकडून दोन गावठी पिस्तुले, जिवंत काडतुसे तसेच घराजवळील गोठ्यात लपवून ठेवलेली रायफल जप्त करण्यात आली असून, या कारवाईमुळे परिसरातील गुन्हेगारी विश्वात मोठी खळबळ उडाली आहे.
अटक करण्यात आलेल्या आरोपीचे नाव अक्षय कल्याण तावरे (वय 35, रा. वाघवस्ती, सांगवी, ता. बारामती) असे आहे. त्याच्यावर पुणे ग्रामीण, सातारा आणि सोलापूर जिल्ह्यांमध्ये मालमत्तेविरुद्धचे तसेच मानवी शरीराविरुद्धचे एकूण 26 गंभीर गुन्हे दाखल असल्याची माहिती पोलिसांनी दिली.
🟢गुप्त माहितीवरून सापळा
पुणे ग्रामीण पोलीस अधीक्षकांच्या आदेशानुसार माळेगाव हद्दीतील रेकॉर्डवरील गुन्हेगारांचा शोध सुरू असताना, 13 जून रोजी माळेगाव पोलीस ठाण्याचे प्रभारी अधिकारी सपोनि कुलदीप संकपाळ यांना एका गुप्त बातमीदारामार्फत महत्त्वाची माहिती मिळाली. अक्षय तावरे हा कमरेला पिस्तूल बाळगून गंभीर गुन्हा करण्याच्या उद्देशाने फिरत असल्याची माहिती मिळताच पोलिसांनी तातडीने कारवाईचे नियोजन केले.
🟡हॉटेलसमोरून पळण्याचा प्रयत्न; पोलिसांनी पाठलाग करून पकडले
गुन्हे शोध पथकाने सांगवी गावात शोधमोहीम सुरू केली असता, अक्षय तावरे हा गावातील कार्तिक हॉटेलसमोर खुर्चीवर बसलेला दिसला. पोलिसांचे पथक आपल्या दिशेने येत असल्याचे लक्षात येताच त्याने तेथून पळ काढण्याचा प्रयत्न केला. मात्र सतर्क पोलिसांनी क्षणाचाही विलंब न लावता त्याचा पाठलाग करून त्याला ताब्यात घेतले.
🔷अंगझडतीत दोन पिस्तुले आणि काडतुसे
आरोपीची अंगझडती घेतली असता त्याच्या कमरेला लपवून ठेवलेली दोन गावठी बनावटीची पिस्तुले, दोन जिवंत काडतुसे आणि दोन रिकाम्या काडतुसांच्या पुंगळ्या आढळून आल्या. यानंतर पोलिसांनी त्याच्या घराची झडती घेतली.
🔶गोठ्यातील ड्रममध्ये लपवून ठेवली होती रायफल
अक्षय तावरे याला त्याच्या वाघवस्ती येथील घरी नेऊन घराशेजारील गोठ्याची तपासणी करण्यात आली. तेथे एका प्लास्टिकच्या ड्रममध्ये लपवून ठेवलेली एक रायफल पोलिसांनी जप्त केली. त्यामुळे या कारवाईत शस्त्रास्त्रांचा मोठा साठा उघडकीस आला.
🟤मध्य प्रदेशातून आणली होती शस्त्रे
पोलिस चौकशीत आरोपीने ही सर्व शस्त्रे सुमारे आठ महिन्यांपूर्वी मध्य प्रदेशातून आणल्याची कबुली दिली. तसेच गावठी पिस्तुलांची चाचणी घेण्यासाठी शिरवली परिसरातील नीरा नदीच्या पात्रात हवेत गोळीबार केल्याचेही त्याने सांगितले. त्याच्याकडून जप्त करण्यात आलेल्या रिकाम्या पुंगळ्या याच गोळीबारातील असल्याचे तपासात निष्पन्न झाले.
🔴शस्त्र अधिनियमांतर्गत गुन्हा दाखल
या प्रकरणी माळेगाव पोलीस ठाण्यात गु.र.नं. 154/2026 अन्वये भारतीय शस्त्र अधिनियम 1959 अंतर्गत गुन्हा दाखल करण्यात आला आहे. न्यायालयाने आरोपीला 16 जून 2026 पर्यंत पोलीस कोठडी सुनावली असून पुढील तपास सुरू आहे.
⚫वरिष्ठांच्या मार्गदर्शनाखाली यशस्वी कारवाई
ही कारवाई पोलीस अधीक्षक संदीपसिंग गिल्ल, अपर पोलीस अधीक्षक गणेश बिरादार आणि उपविभागीय पोलीस अधिकारी सुदर्शन राठोड यांच्या मार्गदर्शनाखाली करण्यात आली. प्रभारी अधिकारी सपोनि कुलदीप संकपाळ, पोउनि डी.आर. साळवे, तुषार भोर तसेच गुन्हे शोध पथकातील अधिकारी व कर्मचाऱ्यांनी ही धडक कारवाई यशस्वी केली.
माळेगाव पोलिसांच्या या धाडसी कारवाईमुळे बेकायदेशीर शस्त्रास्त्र बाळगणाऱ्यांमध्ये भीतीचे वातावरण निर्माण झाले असून, परिसरातील गुन्हेगारीवर आळा बसण्यास मदत होणार असल्याची भावना नागरिकांकडून व्यक्त केली जात आहे.
