इंदापूरमध्ये औद्योगिक क्रांतीची नांदी; रत्नपुरी मळ्यात उभारली जाणार नवी ‘एमआयडीसी’
मंत्रिमंडळाचा ऐतिहासिक निर्णय; एक हजार एकर जमीन एमआयडीसीकडे हस्तांतरित
मुंबई/प्रतिनिधी – वर्षा चव्हाण
इंदापूर तालुक्याच्या विकासाच्या इतिहासात मैलाचा दगड ठरेल असा महत्त्वपूर्ण निर्णय आज राज्य मंत्रिमंडळाने घेतला आहे. महाराष्ट्र राज्य शेती महामंडळाच्या मालकीची इंदापूर तालुक्यातील रत्नपुरी मळ्यातील तब्बल एक हजार एकर जमीन महाराष्ट्र औद्योगिक विकास महामंडळाकडे (एमआयडीसी) हस्तांतरित करण्यास मंत्रिमंडळाने मान्यता दिली आहे. या निर्णयामुळे इंदापूरमध्ये नव्या औद्योगिक वसाहतीच्या उभारणीचा मार्ग अधिकृतपणे मोकळा झाला असून, परिसरातील औद्योगिक विकासाला मोठी चालना मिळणार आहे.
उपमुख्यमंत्री सुनेत्रा अजित पवार यांनी पदभार स्वीकारल्यानंतर झालेल्या पहिल्याच मंत्रिमंडळ बैठकीत हा निर्णय घेण्यात आला, ही बाब विशेष लक्षवेधी मानली जात आहे. इंदापूरच्या सर्वांगीण विकासासाठी हा निर्णय दूरगामी परिणाम करणारा ठरणार असल्याचे मत प्रशासनातील जाणकार व्यक्त करत आहेत.
इंदापूर तालुक्यात औद्योगिक वसाहत उभारण्याचे स्वप्न दिवंगत उपमुख्यमंत्री अजित पवार यांनी पाहिले होते. तालुक्यातील युवकांना स्थानिक पातळीवर रोजगाराच्या संधी उपलब्ध व्हाव्यात, तसेच शेतीपूरक उद्योगांना चालना मिळावी, यासाठी त्यांनी सातत्याने प्रयत्न केले होते. त्यांच्या या संकल्पनेला आज मूर्त स्वरूप मिळत असल्याची भावना स्थानिक पातळीवर व्यक्त केली जात आहे.
या संपूर्ण प्रक्रियेत इंदापूरचे आमदार व कृषिमंत्री दत्तात्रय भरणे यांनीही महत्त्वाची भूमिका बजावली. त्यांनी दिवंगत उपमुख्यमंत्री अजित पवार यांच्याकडे सातत्याने पाठपुरावा करत रत्नपुरी मळ्यात एमआयडीसी स्थापन करण्याची मागणी लावून धरली होती. अखेर त्यांच्या प्रयत्नांना यश आले असून, तालुक्याच्या विकासासाठी हा निर्णय अत्यंत महत्त्वाचा ठरणार आहे.
या नव्या एमआयडीसीमुळे इंदापूर, बारामतीसह संपूर्ण पुणे जिल्ह्यातील औद्योगिक गुंतवणुकीला गती मिळणार आहे. लघु, मध्यम व मोठ्या उद्योगांना येथे स्थायिक होण्यासाठी संधी उपलब्ध होणार असून, हजारो युवकांना थेट व अप्रत्यक्ष रोजगार निर्माण होण्याची शक्यता आहे. याशिवाय स्थानिक उद्योजकतेला चालना, पूरक सेवा क्षेत्रांचा विकास आणि ग्रामीण अर्थव्यवस्थेला नवे बळ मिळेल, असा विश्वास व्यक्त केला जात आहे.
औद्योगिक विकासाच्या दिशेने महाराष्ट्राने आणखी एक निर्णायक टप्पा गाठला असून, येत्या काळात इंदापूर हे नवे औद्योगिक केंद्र म्हणून उदयास येईल, अशी अपेक्षा व्यक्त होत आहे. हा निर्णय इंदापूरच्या भविष्यासाठी सुवर्णाक्षरांनी नोंदवला जाईल, अशी प्रतिक्रिया विविध स्तरांतून उमटत आहे.
