लहान मुलांना कफ सिरप देणे धोकादायक; केंद्राच्या अधिसूचना जारी नागरिकांना सतर्कतेचा इशारा
मार्मिक न्यूज नेटवर्क: नवी दिल्ली दोन वर्षांखालील बालकांना कफ सिरप देऊ नये, असा गंभीर सल्ला केंद्र सरकारने पालकांना दिला आहे. राजस्थान आणि मध्य प्रदेशात अलीकडेच घडलेल्या हृदय पिळवटून टाकणाऱ्या घटनेत तब्बल ११ निरागस बालकांचा कफ सिरप सेवनानंतर मृत्यू झाल्याने आरोग्य विभाग सतर्क झाला आहे.
केंद्र सरकारने जारी केलेल्या सूचनांनुसार, लहान मुलांना साध्या खोकल्यावर किंवा सर्दीवर तत्काळ कफ सिरप देणे टाळावे. त्याऐवजी डॉक्टरांचा सल्ला घेऊनच योग्य औषधोपचार करावा. तज्ज्ञांच्या मते, कफ सिरपमधील काही घटक बालकांच्या यकृत व श्वसनावर गंभीर परिणाम करू शकतात, ज्यामुळे जीवघेणा प्रसंग उद्भवतो. या पार्श्वभूमीवर पालकांना जागरूक राहण्याचे आवाहन करण्यात आले असून, मुलांच्या साध्या आजारालाही हलकं न घेता तज्ज्ञांचा सल्ला घेणं अत्यावश्यक असल्याचं वैद्यकीय तज्ज्ञांनी स्पष्ट केलं आहे. ”
