अमळनेर तालुक्यात ‘ओला दुष्काळ’ जाहीर करण्याची काँग्रेसकडून मागणी..
अमळनेर : विक्की जाधव.
सतत कोसळणाऱ्या अवकाळी पावसामुळे अमळनेर तालुक्यातील शेती, पिके तसेच सामान्य जनतेचे मोठे नुकसान झाले आहे. पावसाच्या अतिरेकामुळे रस्त्यांची दुरवस्था, घरांची पडझड, शेतपिकांचे मोठे नुकसान आणि कीटक रोगांचा प्रादुर्भाव यामुळे शेतकऱ्यांचे जगणे कठीण झालेले आहे. अशा परिस्थितीत तालुक्यात ‘ओला दुष्काळ’ जाहीर करावा आणि शेतकऱ्यांना तातडीने मदत द्यावी, अशी मागणी काँग्रेस पदाधिकाऱ्यांनी निवेदनाद्वारे केली आहे.
निवेदनात म्हटले आहे की, मक्याच्या भुनक्यांना दाणा भरत नाही, कपाशीवरील कैऱ्या धसत आहेत, तर सोयाबीनचे नुकसान आधीच झालेले आहे. याशिवाय कपाशीवर बोंडअळी व लाल्या रोगाचा प्रादुर्भाव मोठ्या प्रमाणात वाढला असून उत्पादनात तब्बल ८० ते ९० टक्के घट येण्याची शक्यता आहे. त्यामुळे नजर आनेवारी ६० टक्क्यांपेक्षा अधिक दाखवली असली तरी प्रत्यक्ष परिस्थिती अत्यंत गंभीर असल्याचे स्पष्ट झाले आहे.
या पार्श्वभूमीवर तालुका काँग्रेसचे पदाधिकारी भागवत केशव सूर्यवंशी व गजेंद्र दत्तात्रय साळुंके यांनी शासनाला त्वरित आर्थिक मदत जाहीर करण्याचे, पांदण रस्त्यांची तातडीने दुरुस्ती करण्याचे आणि शेतकऱ्यांना सरसकट मदत पोहोचविण्याचे आवाहन केले आहे. शासनाने वास्तव परिस्थितीचा त्वरित आढावा घेऊन सकारात्मक निर्णय घ्यावा, अशी ठाम भूमिका निवेदनाद्वारे मांडण्यात आली आहे.
