आता फास्टॅग नाही तर सॅटेलाईट आधारीत टोल सिस्टिम होणार सुरू, नितीन गडकरी यांची मोठी घोषणा..
(विशेष प्रतिनिधी : वर्षा चव्हाण)
दिल्ली : आता सॅटेलाईट आधारीत टोल सिस्टिम सुरू होणार असून यामध्ये फास्टॅग स्कॅन करण्याची गरज नाही. तर सॅटेलाईटच्या मदतीने कारची ओळख पट‍वण्यात येणार असून त्यानंतर संबंधित खातेदाराच्या बँक खात्यातून टोल वसूल करण्यात येईल.
राष्ट्रीय महामार्ग शुल्क अधिनियम 2008 मध्ये सुधारणा करण्याचा निर्णय रस्ते वाहतूक आणि महामार्ग मंत्रालयाने घेतला आहे. सुरूवातीला सॅटेलाईट सिस्टिम योग्य पद्धतीने काम करेपर्यंत फास्टॅग आणि सॅटेलाईट सिस्टिम या दोन्ही पद्धती सुरू असतील. त्यानंतर हळूहळू फास्टॅगवरुन सॅटेलाईट सिस्टिमकडे टोल वसूली हस्तांतरीत करण्यात येईल.
सॅटेलाईट आधारीत टोल वसूली प्रणालीमध्ये कार वा इतर वाहनांना टोल नाक्यावर थांबण्याची गरजच उरणार नाही. तुम्ही टोल नाक्यावरुन कार दामटवून नेली तरी तुमच्या बँक खात्यातून टोल वसूल करण्यात येणार आहे.
