सार्वजनिक आरोग्य विभाग–Children’s Investment Fund Foundation करार; सामाजिक व वर्तन बदल उपक्रमांना नवे बळ
मुंबई/प्रतिनिधी – वर्षा चव्हाण
राज्यातील सार्वजनिक आरोग्य व्यवस्थेला अधिक परिणामकारक आणि लोककेंद्रित बनविण्यासाठी महत्त्वपूर्ण पाऊल उचलत सार्वजनिक आरोग्य विभागाने Children’s Investment Fund Foundation (CIFF), युनायटेड किंगडम सोबत सामंजस्य करार (MoU) केला आहे. सामाजिक व वर्तन बदल संप्रेषण (SBCC) उपक्रम अधिक बळकट करण्याच्या उद्देशाने हा करार करण्यात आला असून, यासाठी मुख्यमंत्री Devendra Fadnavis यांनी विशेष पुढाकार घेतला.
या करारावर सार्वजनिक आरोग्य विभागाचे प्रधान सचिव डॉ. निपुण विनायक, उपसचिव चंद्रकांत विभुते, CIFF चे डॉ. हेमांग शाह व डॉ. अस्मिता जैन तसेच IPi कडून राघवेश राजन आणि अविधा यांच्या उपस्थितीत स्वाक्षऱ्या करण्यात आल्या.
मुख्यमंत्री Devendra Fadnavis यांनी सांगितले की, या भागीदारीमुळे सामाजिक व वर्तन बदल उपक्रम अधिक नाविन्यपूर्ण, संशोधनाधारित आणि पुराव्यावर आधारित पद्धतीने राबविले जातील. समुदायाचा सक्रिय सहभाग आणि प्रभावी संवाद यावर विशेष भर दिला जाणार असून, नागरिकांच्या आरोग्यविषयक सवयींमध्ये सकारात्मक बदल घडविणे हा मुख्य उद्देश आहे.
हा उपक्रम माता व बाल आरोग्य, पोषण, प्रतिबंधात्मक आरोग्य सेवा आणि रोग नियंत्रण यांसारख्या महत्त्वाच्या क्षेत्रांना बळकटी देणार आहे. विशेषतः वंचित आणि दुर्लक्षित घटकांपर्यंत आरोग्य सेवा व संदेश प्रभावीपणे पोहोचविण्यावर लक्ष केंद्रित केले जाईल.
कराराच्या माध्यमातून आधुनिक तंत्रज्ञान, संवाद माध्यमे आणि स्थानिक समुदायांचा सहभाग यांचा प्रभावी वापर करून कुपोषण, स्वच्छता, लसीकरण आणि आरोग्यदायी सवयींबाबत जनजागृती वाढवली जाणार आहे. ग्रामीण आणि दुर्गम भागांमध्ये या उपक्रमांची अंमलबजावणी अधिक प्रभावी करण्यासाठी CIFF तांत्रिक व धोरणात्मक सहकार्य करणार आहे.
सार्वजनिक आरोग्य विभागाने हा करार आरोग्य क्षेत्रातील एक महत्त्वपूर्ण टप्पा असल्याचे नमूद केले असून, यामुळे महाराष्ट्रात दीर्घकालीन सकारात्मक सामाजिक बदल घडून येतील, असा विश्वास व्यक्त करण्यात आला आहे.
