हिंदू मुस्लिम एकोप्याची परंपरा जोपासणारा हा गणेशोत्सव. आजही. मस्जिद मध्ये मोठ्या उत्साहात साजरा होतो गणेशोत्सव.
मार्मिक न्यूज नेटवर्क : विक्की जाधव.
गणेशोत्सवाच्या काळात महाराष्ट्रातल्या कोल्हापूर आणि सांगलीतल्या काही गावांमध्ये हिंदू-मुस्लीम सलोख्याची एक अनोखी परंपरा पाहायला मिळतेय. मुस्लीम धर्मियांचं प्रार्थनास्थळ असलेल्या काही मशिदींमध्ये गेली चाळीसहून अधिक वर्षं गणपतीच्या मूर्तीची प्रतिष्ठापना केली जात आहे.
सांगलीच्या वाळवा तालुक्यात गोटखिंडी हे गाव आहे. इथल्या झुझार चौकातल्या मशिदीत न्यू गणेश मंडळाच्या गणपतीची दर वर्षी दहा दिवसांसाठी प्रतिष्ठापना करण्यात येते. यंदाचं त्यांचं प्रतिष्ठापनेचं 44 वं वर्ष आहे.
या गणपतीचं दर्शन घेण्यासाठी हिंदू आणि मुस्लीम धर्मीय लोक मोठ्या संख्येने येत असतात.
त्यां वर्षी पावसात गणपती भिजत होता गणपती..
त्यावेळी साध्या पद्धतीनं गणपती बसवला होता. म्हणजेच गणपतीसाठी चांगला साजेसा मंडप नव्हता, गणेशोत्सव म्हणजे पावसाळ्याचा काळ. असाच एका रात्री मोठा पाऊस आला. मंडप किंवा इतर काही व्यवस्था नसल्यानं पावसात गणपतीची मूर्ती भिजायला लागली. गावातील एका मुस्लीम समाजातील व्यक्तीनं ते पाहिलं. त्यानं गणेश मंडळातील लोकांना बोलवत याची कल्पना दिली.
त्यानंतर सगळेजण त्याठिकाणी जमले. काय करायचं यावर चर्चा सुरू होती. त्याचवेळी निजाम पठाण आणि त्यांच्या नातेवाईकांनी पावसात भिजणारी गणपतीची मूर्ती जवळच्या मशिदीत ठेवा अशी विनंती सगळ्यांना केली.
त्याठिकाणी असणाऱ्या सगळ्यांनी ठरवलं आणि गणपती मूर्ती मशिदीत ठेवली. त्यावर्षी विसर्जन होईपर्यत त्या मशिदीतच गणपतीची पूजा अर्चना करण्यात आली.
मोहरम आणि गणपती एकाच दिवशी.
लखन पठाण यांनी याबाबत बोलताना म्हटलं की, “आमच्या गावात आम्ही सर्व जाती धर्माचे लोक एकोप्यानं राहतो. आमचे आजोबा निजाम पठाण यांनी, त्यानंतर माझ्या वडिलांनीही गणपती उत्सवात सहभाग घेतला. आता मी स्वतः सहभागी असतो. हिंदू आणि मुस्लीम दोन्हीही समाजाचे सण आम्ही एकत्रित साजरे करतो. दोन वेळा मोहरम आणि गणपती एकत्र आले. त्यावेळी पीर आणि गणपती यांची एकत्रित मिरवणूक काढली होती.”
धर्माच्या ठेकेदारांचा एकदा आम्हालाही झाला होता त्रास..
गणेशोत्सव सुरू असतानाचा एक किस्सा पाटील आणि पठाण यांनी सांगितला. मुस्लीम पंथातील काही लोक एकदा गावात आले होते. त्यांनी मुस्लीम बांधवाना गणेशोत्सव साजरा करू नका असं म्हटलं. या उत्सवाबाबत नकारात्मक गोष्टी सांगितल्या. पण, आमच्या गावातील सर्वच्या सर्व मुस्लीम बांधवानी आम्ही हिंदू-मुस्लीम वर्षानुवर्षे भावाभावासारखे वागतोय, असं त्यांना स्पष्टपणे सांगितलं. आम्हाला या उत्सवातून ऊर्जा मिळते, ‘तुम्ही दरी पेरू नका’ असं त्यांनी सांगितलं आणि सन्मानाने त्यांना गावाबाहेरचा रस्ता दाखवला.
पूर्वी बैलगाड्या होत्या. त्यामुळं गणपतीची मिरवणूक बैलगाड्यातून गुलाल उधळत निघायची, आता तशाच जल्लोषात ट्रॅक्टरने निघते, असं लखन अन पठाण यांनी सांगितले.
