सिलेपार जंगलातील टेकडीवर पट्टेदार वाघाचे दर्शन प्रवाशांनी कॅमेऱ्यात टिपला दुर्मिळ क्षण
प्रदिप राऊत /भिवापूर प्रतिनिधी
भिवापूर :नांद परिसरातील सिलेपार जंगलात गुरुवारी सकाळच्या सुमारास एका भव्य पट्टेदार वाघाचे दर्शन झाल्याने परिसरात उत्सुकतेचे वातावरण निर्माण झाले. जंगलातून प्रवास करणाऱ्या काही प्रवाशांना टेकडीवर काही वेळ शांतपणे उभा असलेला वाघ दिसून आला. त्यांनी प्रसंगावधान राखत सुरक्षित अंतरावरून या दुर्मिळ क्षणाचे छायाचित्र आणि व्हिडिओ आपल्या मोबाईलमध्ये टिपले. काही क्षण टेकडीवर वावरल्यानंतर वाघ जंगलाच्या दिशेने निघून गेला.
वाघाचे दर्शन झाल्याची माहिती परिसरात वाऱ्यासारखी पसरली. या घटनेमुळे वन्यजीवप्रेमींमध्ये आनंदाचे वातावरण निर्माण झाले असून सिलेपार जंगलातील जैवविविधता आणि वन्यजीवांचे अस्तित्व पुन्हा एकदा अधोरेखित झाले आहे.
स्थानिक नागरिकांच्या मते या भागात अधूनमधून वन्यप्राण्यांचा वावर दिसून येतो मात्र टेकडीवर उभा असलेला वाघ प्रत्यक्ष पाहण्याची संधी अत्यंत दुर्मिळ असल्याने हा क्षण अनेकांसाठी संस्मरणीय ठरला.
वन विभागाने या घटनेनंतर नागरिकांना आणि पर्यटकांना विशेष सतर्क राहण्याचे आवाहन केले आहे. वाघ अथवा इतर कोणताही वन्यप्राणी दिसल्यास त्याच्या जवळ जाण्याचा प्रयत्न करू नये तसेच त्याला छेडणे किंवा आवाज करून त्रास देणे टाळावे असे सांगण्यात आले आहे. सुरक्षित अंतर राखून वन विभागाच्या सूचनांचे काटेकोर पालन करावे असेही आवाहन करण्यात आले.
वन्यजीव तज्ज्ञांच्या मते सिलेपार जंगल परिसर हा वाघासह विविध वन्यप्राण्यांचा महत्त्वाचा अधिवास आहे. अशा प्रकारचे दर्शन हे जंगलातील पर्यावरणीय संतुलन चांगले असल्याचे आणि वन्यजीवांसाठी पोषक अधिवास उपलब्ध असल्याचे सकारात्मक संकेत मानले जातात. त्यामुळे या भागातील जंगलांचे संरक्षण आणि संवर्धन अधिक प्रभावीपणे करण्याची गरज असल्याचे मतही व्यक्त करण्यात येत आहे.
स्थानिक नागरिकांनीही जंगल परिसरात अनावश्यक गर्दी न करता वन्यजीवांना नैसर्गिक वातावरणात मुक्तपणे वावरण्यास सहकार्य करण्याचे आवाहन केले आहे. वन्यजीवांचे संरक्षण ही सर्वांची सामूहिक जबाबदारी असून त्यासाठी प्रत्येकाने जबाबदारीने वागणे आवश्यक असल्याचे वन विभागाने स्पष्ट केले आहे.
